پاکستان تحریک انصاف (پی ٹی آئی )کے چیئرمین بیرسٹر گوہر نے کہا ہے کہ ستائیسویں آئینی ترمیم آئین کی روح کے مخالف ہے ، اس آئینی ترمیم سے قوم کو مزید تقسیم نہ کریں۔
قومی اسمبلی کے اجلاس میں خطاب کرتے ہوئے بیرسٹر گوہر نے کہا کہ آئینی ترمیم اس طریقے سے نہیں ہوتی، نہ ہمارےساتھ کوئی رابطہ ہوانہ 27 ویں ترمیم کا مسودہ شیئر ہوا۔
انہوں نے کہا کہ سپیریم کورٹ کے پاس 56 ہزار کیسز زیر التوا ہیں، کہاں گئے وہ سینئر ججز جنہوں نے یہ کیسز نمٹانے تھے،بانی پی ٹی آئی جیل میں بیٹھ کر کہہ رہا ہے کہ عوام کی خاطر جیل میں بیٹھا ہوں، بانی پی ٹی آئی آئین وقانون کی بالادستی کیلئے جیل میں ہیں۔
انہوں نے کہا کہ 27ویں آئینی ترمیم سے وفاق کو خطرہ ہے، حکومت وفاق کا اسٹرکچرخطرے میں ڈالنا چاہتی ہے، صوبے انتظارکررہے ہیں کہ 11واں این ایف سی ایوارڈ کب آئے گا۔
چیئرمین پی ٹی آئی نے کہا کہ بعض لوگوں کو زیادہ اختیار دینا وفاق کو خطرے میں ڈالنے کے مترادف ہوگا، 27ویں ترمیم سے این ایف سی میں صوبوں کاشیئرکم کرنے کا پلان ہے۔
انہوں نے کہا کہ حکومت کے پاس آئین میں ترمیم کاکوئی اخلاقی جواز نہیں، دنیابھر میں آئین میں ترامیم اتفاق رائے سے کی جاتی ہیں۔
بیرسٹر گوہر نے کہا کہ 27ویں آئینی ترمیم لانا قوم کو تقسیم کرنے کے مترادف ہے، حکومت مہربانی کرکے اپنی مدت کے دن پورے کرے۔
یہ بھی پڑھیں :27ویں ترمیم کا فیصلہ پہلے ہو چکا، پیپلزپارٹی ٹوپی ڈرامے میں شریک ہے، اسد قیصر
پاکستان تحریک انصاف کے سینئر رہنما اور سابق اسپیکر قومی اسمبلی اسد قیصر نے کہا ہے کہ 27ویں آئینی ترمیم پر فیصلہ پہلے ہی ہوچکا ہے، اب صرف عوام کو دکھانے کے لیے سیاسی ڈرامہ رچایا جا رہا ہے، جس میں پیپلز پارٹی بھی شریک ہے۔
اسلام آباد میں تحریکِ تحفظِ آئینِ پاکستان کے رہنماؤں کے ہمراہ پریس کانفرنس کرتے ہوئے اسد قیصر نے کہا کہ آج اپوزیشن کی ہنگامی بیٹھک بلائی گئی تھی ،27 آئینی ترمیم کا پنڈورا باکس کھولا گیا ہے۔
ان کا کہنا تھا کہ بلاول بھٹو زرداری کا حالیہ بیان تشویشناک ہے، پی پی پی بھی اِس ٹوپی ڈرامے میں شریک ہے۔
رہنما تحریک انصاف نے کہا کہ ذوالفقار بھٹو کی پیپلز پارٹی نے آئین دیا، بینظیر بھٹو نے جمہوریت کے لیے قربانی دی، لیکن آج کی پیپلز پارٹی جمہوریت کو دفن کرنے میں مصروف ہے۔
انہوں نے سوال اٹھایا کہ میاں نواز شریف کا نعرہ “ووٹ کو عزت دو” اب کہاں گیا؟
اسد قیصر نے مزید کہا کہ اقتدار جو قدموں میں گر کر حاصل کیا جائے، اس کی کوئی قدر نہیں۔ نواز شریف جو خود کو جمہوریت کا چیمپئن کہتے تھے، آج خاموش ہیں۔ ہم نے 27ویں ترمیم کے معاملے پر بانی تحریک انصاف کو بھی اپنی سفارشات بھیج دی ہیں۔
