افغانوں کیلئے امریکی دروازے بند، افغان پاسپورٹ ہولڈرز کے ویزے فوری طور پر معطل، امریکی محکمہ خارجہ اور وزیر خارجہ کی تصدیق
تفصیلات کے مطابق امریکی محکمہ خارجہ نے افغان پاسپورٹ پر سفر کرنے والے تمام افراد کے لیے ویزوں کا اجرا روک دیا ہے۔ امریکی وزیر خارجہ مارکو روبیو نے ایکس پر ایک پوسٹ میں تصدیق کی کہ محکمہ خارجہ نے افغان پاسپورٹ ہولڈرز کے لیے ویزے جاری کرنے کا عمل معطل کر دیا ہے۔
امیگریشن حکام نے بھی بتایا کہ وہ مستقبل قریب کے لیے پناہ کی تمام درخواستوں پر فیصلے روک رہے ہیں۔ اسی سلسلے میں U.S. Citizenship and Immigration Services نے پناہ گزینوں سے متعلق تمام فیصلے معطل کر دیے ہیں۔ ایجنسی کے ڈائریکٹر Joseph Edlow نے کہا کہ کسی بھی غیر ملکی کی جانچ پڑتال اور زیادہ سے زیادہ اسکریننگ کو یقینی بنانے تک تمام فیصلے روک دیے گئے ہیں۔
یہ فیصلہ ایک ایسے وقت میں سامنے آیا ہے جب امریکہ میں سکیورٹی خدشات بڑھ گئے ہیں۔ بدھ کو وائٹ ہاؤس کے قریب ہونے والی فائرنگ میں ایک نیشنل گارڈ ہلاک اور ایک شدید زخمی ہوا تھا، اور حملہ آور افغان شہری تھا جو 2021 میں ری سیٹلمنٹ پروگرام کے تحت امریکہ میں داخل ہوا تھا۔
یاد رہے کہ اس سے پہلے امریکی صدر ڈونلڈ ٹرمپ نے بھی اعلان کیا تھا کہ تیسری دنیا کے تمام ملکوں سے ہجرت کو مستقل طور پر روکا جائے گا، اور ایسے پناہ گزینوں کی قانونی شہریت منسوخ کی جائے گی جو امریکی داخلی امن کے لیے خطرہ ثابت ہوں۔
ماہرین کے مطابق موجودہ فیصلے کا مقصد پناہ گزینوں کی جانچ پڑتال کو مزید سخت بنانا اور امریکہ میں سکیورٹی کو یقینی بنانا ہے۔ افغان پاسپورٹ ہولڈرز کے لیے امریکی ویزوں کی معطلی کا یہ اقدام بین الاقوامی سطح پر بھی زیرِ بحث ہے اور اس کے سیاسی اور انسانی اثرات مرتب ہونے کا امکان ہے۔
