عالمی اور مقامی مارکیٹوں میں سونے کی قیمت میں کمی ریکارڈ کی گئی ہے، جبکہ اس کے برعکس چاندی کی قیمتوں میں اضافہ دیکھنے میں آیا ہے۔ قیمتوں میں یہ اتار چڑھاؤ عالمی مالیاتی منڈیوں میں تبدیلیوں اور سرمایہ کاروں کے رویے کا نتیجہ قرار دیا جا رہا ہے۔
بین الاقوامی بلین مارکیٹ میں فی اونس سونے کی قیمت 15 ڈالر کی کمی کے بعد 5 ہزار 082 ڈالر کی سطح پر آ گئی ہے۔ عالمی منڈی میں کمی کے اثرات مقامی مارکیٹ پر بھی مرتب ہوئے، جہاں پاکستان میں سونے کی قیمتوں میں نمایاں کمی دیکھی گئی۔
مقامی صرافہ بازاروں میں فی تولہ سونے کی قیمت 1 ہزار 500 روپے کی کمی کے بعد 5 لاکھ 30 ہزار 562 روپے کی سطح پر آ گئی ہے۔ اسی طرح فی دس گرام سونے کی قیمت 1 ہزار 286 روپے گھٹ کر 4 لاکھ 16 ہزار 980 روپے ہو گئی ہے۔
دوسری جانب چاندی کی قیمتوں میں اضافہ ریکارڈ کیا گیا ہے۔ فی تولہ چاندی کی قیمت 212 روپے کے اضافے سے 11 ہزار 640 روپے کی نئی بلند ترین سطح پر پہنچ گئی، جبکہ فی دس گرام چاندی کی قیمت 182 روپے بڑھ کر 9 ہزار 979 روپے ہو گئی ہے۔
ماہرین کے مطابق عالمی معاشی حالات، ڈالر کی قدر میں اتار چڑھاؤ اور سرمایہ کاروں کی جانب سے منافع خوری کے رجحان کے باعث سونے کی قیمت میں کمی دیکھنے میں آئی ہے، تاہم طویل المدتی بنیادوں پر سونے کو اب بھی محفوظ سرمایہ کاری تصور کیا جا رہا ہے۔
