امریکی صدر ڈونلڈ ٹرمپ نے اسرائیلی وزیراعظم بنجمن نیتن یاہو سے مطالبہ کیا ہے کہ وہ لبنان میں جاری اسرائیلی حملوں کی شدت میں کمی لائیں تاکہ ایران کے ساتھ ہونے والے مذاکرات کے لیے سازگار ماحول پیدا کیا جا سکے۔
امریکی میڈیا (این بی سی نیوز) کے مطابق صدر ٹرمپ ایران کے ساتھ سفارتی بات چیت کو آگے بڑھانا چاہتے ہیں اور اس مقصد کے لیے لبنان میں کشیدگی کا کم ہونا ناگزیر ہے۔
دوسری جانب وزیراعظم شہباز شریف نے لبنان کے وزیراعظم نواف سلام سے ٹیلیفونک رابطہ کیا ہے جس میں لبنان کے خلاف اسرائیلی جارحیت کی شدید مذمت کی گئی۔
وزیراعظم شہباز شریف نے ہزاروں قیمتی جانوں کے ضیاع پر گہرے دکھ کا اظہار کرتے ہوئے کہا کہ پاکستان علاقائی امن کے لیے مخلصانہ کوششوں میں مصروف ہے اور اسی جذبے کے تحت ایران اور امریکہ کے درمیان امن مذاکرات کا انعقاد کیا جا رہا ہے۔
لبنانی وزیراعظم نواف سلام نے امن کی کوششوں پر وزیراعظم شہباز شریف کا شکریہ ادا کیا اور لبنان پر ہونے والے حملوں کو فوری طور پر رکوانے کے لیے پاکستان سے تعاون طلب کیا۔
دونوں رہنماؤں نے مستقبل میں بھی قریبی رابطے میں رہنے پر اتفاق کیا ہے۔
