وفاقی ادارہ شماریات کی تازہ رپورٹ کے مطابق ملک میں مہنگائی کی شرح میں مزید اضافہ ہو گیا ہے جس کے باعث عوام کی روزمرہ زندگی پر بوجھ بڑھ گیا ہے۔ رپورٹ میں بتایا گیا ہے کہ مہنگائی کی شرح میں گزشتہ ہفتے 0.17 فیصد اضافہ ہوا ہے جبکہ سالانہ بنیاد پر مہنگائی کی شرح 3.34 فیصد تک پہنچ گئی ہے۔
اعداد و شمار کے مطابق، گزشتہ ہفتے مہنگائی میں اضافہ جاری رہا اور اشیائے ضروریہ کی قیمتوں میں نمایاں فرق دیکھا گیا۔ کل 51 اشیاء میں سے 21 کی قیمتوں میں اضافہ ہوا جبکہ 6 اشیاء کی قیمتیں کم ہوئیں۔ خاص طور پر انڈے، مرغی، پیاز، گھی اور آٹے کی قیمتوں میں نمایاں اضافہ دیکھا گیا ہے۔
تفصیلات کے مطابق ایک ہفتے کے دوران مرغی کی قیمت میں 8.92 فیصد، انڈوں کی قیمت میں 2.25 فیصد، آٹے کی قیمتوں میں 5.74 فیصد، پیاز کی قیمت میں 7.47 فیصد، لہسن کی قیمت میں 0.86 فیصد، گھی کی قیمت میں 0.86 فیصد اور گڑ کی قیمت میں 1.70 فیصد اضافہ ریکارڈ کیا گیا ہے۔
دوسری جانب، چند اشیاء کی قیمتوں میں کمی بھی دیکھی گئی ہے۔ آلو کی قیمت میں 0.93 فیصد، ٹماٹر کی قیمت میں 11.34 فیصد، کیلوں کی قیمت میں 1.29 فیصد، دال چنا کی قیمت میں 0.35 فیصد اور ایل پی جی کی قیمت میں 0.59 فیصد کمی ریکارڈ کی گئی ہے۔
ماہرین اقتصادیات کا کہنا ہے کہ مہنگائی کی اس بڑھتی ہوئی شرح سے عام آدمی کی قوت خرید متاثر ہو رہی ہے اور ضروری ہے کہ حکومت اس مسئلے کے حل کے لیے فوری اقدامات کرے۔
