اسلام آباد: وفاقی وزیر داخلہ محسن نقوی نے کہا ہے کہ افغان طالبان نے پاکستان پر حملہ کرکے بھیانک غلطی کی ہے اور انہیں اس کے سنگین نتائج بھگتنا پڑیں گے۔
انہوں نے افغان طالبان کی جانب سے شہری آبادی کو نشانہ بنانے کی شدید الفاظ میں مذمت کرتے ہوئے اسے ناقابل برداشت جارحیت قرار دیا۔
محسن نقوی کا کہنا تھا کہ بزدل دشمن نے رات کی تاریکی میں وار کیا اور معصوم شہریوں کو نشانہ بنانے کی مذموم کوشش کی، تاہم پاک فوج نے اس جارحیت کا منہ توڑ جواب دیا۔ انہوں نے واضح کیا کہ قوم اپنی مسلح افواج کے شانہ بشانہ کھڑی ہے اور ملک کے دفاع پر کوئی سمجھوتہ نہیں کیا جائے گا۔
دوسری جانب وزیر دفاع خواجہ آصف نے کہا کہ ہماری بہادر افواج اس وقت بھارت کی پراکسی طالبان اور افغان جارحیت کا مؤثر جواب دے رہی ہیں۔ انہوں نے سوشل میڈیا پر جاری اپنے بیان میں کہا کہ انشاءاللہ شکست دشمن کا مقدر بنے گی۔
خواجہ آصف نے کہا کہ نیٹو افواج کے انخلاء کے بعد توقع تھی کہ افغانستان میں امن قائم ہوگا اور طالبان افغان عوام کے مفادات اور خطے کے استحکام پر توجہ دیں گے، مگر اس کے برعکس طالبان نے افغانستان کو بھارت کی کالونی بنا دیا اور دنیا بھر کے دہشت گردوں کو وہاں اکٹھا کرکے دہشت گردی برآمد کرنا شروع کر دی۔
نیٹو کی افواج کے انخلاء کے بعد یہ توقع کی جاتی تھی کہ افغانستان میں امن ھو گا اور طالبان افغانُ عوام کے مفادات اور علاقہ میں امن پہ توجہ مرکوز کریںُ گے۔مگر طالبان نے افغانستان کو ھندوستان کی کالونی بنا دیا۔ ساری دنیا کے دھشت گردوں کا افغانستان میں اکٹھا کر لیا اور دھشت گردی کو…
— Khawaja M. Asif (@KhawajaMAsif) February 26, 2026
وزیر دفاع کا کہنا تھا کہ طالبان نے اپنی عوام کو بنیادی انسانی حقوق سے محروم کیا اور خواتین کو وہ حقوق بھی نہیں دیے جو اسلام دیتا ہے۔
یہ بھی پڑھیں : آپریشن غضب للحق: انگور اڈہ اور شوال سیکٹر میں پاک فوج کی مؤثر جوابی کارروائیاں، افغان پوسٹیں تباہ، ایک پوسٹ پر قبضہ
انہوں نے کہا کہ پاکستان نے براہ راست اور دوست ممالک کے ذریعے حالات کو معمول پر رکھنے کے لیے بھرپور سفارت کاری کی، مگر جب پاکستان کو جارحیت کا نشانہ بنانے کی کوشش کی گئی تو افواج پاکستان نے فیصلہ کن جواب دیا۔
خواجہ آصف نے سخت لہجے میں کہا کہ پاکستان کی فوج سمندر پار سے نہیں آئی، ہم تمہارے ہمسائے ہیں اور تمہاری اوقات جانتے ہیں۔ ہمارا صبر کا پیمانہ لبریز ہو چکا ہے، اب کھلی جنگ کی صورت حال ہے اور دشمن کو واضح پیغام دیا جا چکا ہے۔
