دبئی میں بزرگ شہریوں کی فلاح و بہبود کے لیے نیا ہیریٹیج ولیج منصوبہ شروع کر دیا گیا ہے،رپورٹ کے مطابق منصوبے کا مقصد سماجی، ثقافتی، صحت، تفریحی اور کمیونٹی سرگرمیوں کے لیے ایک مربوط، محفوظ اور باوقار ماحول فراہم کرنا ہے۔
خلیج ٹائمز کے مطابق یہ منصوبہ دبئی اوقاف نے امارات ایسوسی ایشن فار کیئر اینڈ ویلفیئر آف پیرنٹس، رأس الخیمہ کے تعاون سے شروع کیا ہے، یہ منصوبہ السیاح اینڈومنٹ فنڈ کے ذریعے فنڈ کیا جا رہا ہے اور اسے 150 سے زائد بزرگ شہریوں کی خدمت کے لیے تیار کیا گیا ہے۔
رپورٹ کے مطابق ہیریٹیج ولیج میں روایتی اماراتی ورثے سے متاثر ماحول فراہم کیا جائے گا، جس کا مقصد بزرگ افراد کے معیارِ زندگی کو بہتر بنانا، انہیں سماجی سرگرمیوں میں فعال رکھنا اور قومی شناخت و ثقافتی ورثے سے جوڑے رکھنا ہے۔
منصوبے میں 14 روایتی دکانیں شامل ہوں گی، جہاں مقامی ثقافت، دستکاری اور اماراتی ورثے کو اجاگر کرنے کے ساتھ ساتھ ثقافتی، سماجی اور تفریحی تقریبات کے لیے مخصوص جگہیں بھی بنائی جائیں گی، جبکہ صحت، سماجی رابطوں اور کھیلوں کی سرگرمیوں کے لیے بھی خصوصی سہولتیں فراہم کی جائیں گی، تاکہ بزرگ شہری متحرک، خوشگوار اور کمیونٹی زندگی کا حصہ رہ سکیں۔
ان کے مطابق ہیریٹیج ولیج کا مقصد بزرگ شہریوں کے درمیان سماجی روابط کو مضبوط بنانا، انہیں مسلسل شرکت کے مواقع فراہم کرنا اور موجودہ و آنے والی نسلوں کے درمیان ثقافتی تعلق کو مزید گہرا کرنا ہے۔
