امیر جماعت اسلامی حافظ نعیم الرحمان نے کہا ہے کہ بجلی کی قیمتوں میں کمی ان کی جماعت کی جدوجہد کا نتیجہ ہے اور اس میں مزید کمی کی جانی چاہیے۔
ان کا کہنا تھا کہ وزیر اعظم کی جانب سے بجلی کی قیمتوں میں کمی کا اعلان خوش آئند ہے، تاہم یہ کمی کا صرف پہلا مرحلہ ہے۔
حافظ نعیم الرحمان نے مزید کہا کہ عوام کو بجلی بلوں میں مزید ریلیف فراہم کیا جائے تاکہ ان کی مشکلات کم ہو سکیں۔ انہوں نے مطالبہ کیا کہ 1994 سے تمام آئی پی پیز کا فرانزک آڈٹ کیا جائے تاکہ بجلی کی قیمتوں میں مزید کمی لانے کے ذرائع کو تلاش کیا جا سکے۔
امیر جماعت اسلامی نے پیٹرول کی قیمتوں میں کمی کا بھی مطالبہ کیا اور کہا کہ پیٹرولیم لیوی کے نام پر اضافی وصولی بند کی جائے۔
ان کا کہنا تھا کہ ناجائز ٹیکسز اور ظالمانہ سلیب سسٹم کو ختم کیا جائے تاکہ عوام کو مالی مشکلات کا سامنا نہ ہو۔
حافظ نعیم الرحمان نے اعلان کیا کہ جماعت اسلامی آئندہ 7 اپریل کو ایک اہم اجلاس میں آئندہ کے لائحہ عمل کا اعلان کرے گی، جس میں عوامی مسائل کے حل کے لیے مزید اقدامات تجویز کیے جائیں گے۔
یہ بھی پڑھیں بجلی بلوں میں ٹی وی لائسنس فیس ختم کرنے کافیصلہ
انہوں نے کہا کہ جماعت اسلامی عوام کے حقوق کی جنگ لڑتی رہے گی اور حکومتی فیصلوں پر کڑی نظر رکھے گی تاکہ عوامی مفادات کو یقینی بنایا جا سکے۔
