چینی وزیر خارجہ وانگ یی نے پاکستان کے نائب وزیر اعظم و وزیر خارجہ محمد اسحاق ڈار سے ٹیلیفونک رابطے میں پاکستان کی انسداد دہشت گردی کی کوششوں کے لیے چین کی مکمل حمایت کا اعادہ کیا۔
وانگ یی کا کہنا تھا کہ دہشت گردی کا مقابلہ کرنا تمام اقوام کی مشترکہ ذمہ داری ہے اور چین پاکستان کی دہشت گردی کے خلاف جنگ میں اس کا حامی ہے۔
چینی وزیر خارجہ نے مزید کہا کہ پاکستان کی انسداد دہشت گردی کی کوششوں کی حمایت چین کے وسیع عزم کا حصہ ہے جس کا مقصد علاقائی امن و استحکام کو فروغ دینا ہے۔ انہوں نے پاکستان کے “معقول سیکورٹی خدشات” کو سمجھتے ہوئے اس کی خودمختاری اور سلامتی کے مفادات کے تحفظ کے لیے چین کی حمایت کا وعدہ کیا۔
یہ بیان پاکستان اور بھارت کے درمیان بڑھتی ہوئی کشیدگی کے تناظر میں آیا ہے، خاص طور پر حالیہ پہلگام حملے کے بعد جب دونوں ممالک کے تعلقات میں تناؤ پیدا ہوا۔ وانگ یی نے اس موقع پر چین کے مستقل موقف کا اعادہ کیا کہ وہ دہشت گردی کی تمام شکلوں کی مخالفت کرتا ہے اور اس کے خلاف عالمی سطح پر اقدامات کی حمایت کرتا ہے۔
یہ بھی پڑھیں بھارت نہ پانی کا رخ موڑ سکتا ہے، نہ ہی پانی روک سکتا ہے: خواجہ آصف
چین کی جانب سے پاکستان کو دی جانے والی اس حمایت نے عالمی سطح پر پاکستان کی پوزیشن کو مستحکم کیا ہے اور دہشت گردی کے خلاف عالمی کوششوں میں چین کی شراکت داری کو مزید واضح کیا ہے۔
