خیبرپختونخوا اسمبلی کی پبلک اکاؤنٹس کمیٹی کا بڑا فیصلہ، کوہستان مالی اسکینڈل کی انٹرنل انکوائری تین دن میں مکمل کرنے کی ہدایت۔
تفصیلات کے مطابق خیبرپختونخوا اسمبلی کی پبلک اکاؤنٹس کمیٹی نے کوہستان میں ہونے والے مالی اسکینڈل کی تحقیقات کے لیے اہم قدم اٹھایا ہے۔ کمیٹی نے انٹرنل انکوائری تین دن کے اندر مکمل کرنے کی ہدایت کی ہے اور محکمہ خزانہ، سی اینڈ ڈبلیو، اور اکاونٹنٹ جنرل آفس کو اس سلسلے میں اگلے اجلاس میں رپورٹ پیش کرنے کا کہا ہے۔
اسپیکر خیبرپختونخوا اسمبلی، بابرسلیم سواتی کی زیرصدارت ہونے والے اجلاس میں متعلقہ حکام نے شرکت کی۔ اجلاس کے دوران بابر سلیم سواتی نے کہا کہ ابتدائی طور پر یہ اسکینڈل 36 ارب کا بتایا جا رہا تھا، لیکن اب یہ 200 ارب روپے کا معاملہ لگ رہا ہے۔ اسپیکر نے تمام متعلقہ محکموں کو برابر کا ذمہ دار قرار دیا اور کہا کہ ہر محکمے کے افراد اپنے حصے کے لیے لڑ رہے ہیں۔ انہوں نے مزید کہا کہ ملوث افراد کو معطل کیا جائے، ورنہ عوام ہم پر ہنسیں گے۔
بابر سلیم سواتی نے یہ بھی کہا کہ عوام کو یہ جاننا چاہیے کہ ہمارے ادارے کتنی بدعنوانی میں ملوث ہیں، اور یہ سلسلہ ختم کیا جائے گا۔ ان تمام ذمہ داروں کو قانون کے کٹہرے میں لایا جائے گا۔
دوسری جانب، خیبرپختونخوا اسمبلی میں اپوزیشن اراکین نے بھی اس معاملے پر شدید تشویش کا اظہار کیا۔ ان کا کہنا تھا کہ جعلی کنسٹرکشن کمپنی کے ذریعے اور ہزاروں چیک نکال کر سرکاری محکموں نے کھلے عام خورد برد کی۔ اپوزیشن اراکین نے انکشاف کیا کہ اس بدعنوانی میں مقامی افراد کے علاوہ دیگر لوگ بھی ملوث ہیں، اور اس اسکینڈل کا پس منظر بھی اہمیت کا حامل ہے۔ ان کا کہنا تھا کہ ترقیاتی بجٹ کے بغیر اربوں روپے نکالے گئے ہیں، جو کہ ایک سنگین معاملہ ہے۔
اس معاملے کی انکوائری اور تحقیقات کا عمل جاری ہے اور عوام کی نظریں اس پر ہیں کہ کیا انصاف کے تقاضے پورے ہوں گے اور ملوث افراد کو قانون کے کٹہرے میں لایا جائے گا۔
