لندن :پاکستان چیمپئنز نے ورلڈ چیمپئن شپ آف لیجنڈز 2025 میں جنوبی افریقا چیمپئنز کو 31 رنز سے شکست دے کر ایونٹ میں مسلسل دوسری کامیابی حاصل کرلی۔
انگلینڈ میں جاری اس ایونٹ میں جمعہ کو کھیلے گئے میچ میں پاکستان نے پہلے بیٹنگ کرتے ہوئے 198 رنز کا بڑا ہدف دیا، جس کے تعاقب میں جنوبی افریقی ٹیم 167 رنز تک محدود رہی۔
پاکستان نے ٹاس ہارنے کے بعد پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 198 رنز اسکور کیے۔ اوپنرز شرجیل خان (19) اور کامران اکمل (17) نے تیز آغاز فراہم کیا، تاہم کپتان محمد حفیظ صرف 8 رنز بنا سکے۔
اس کے بعد شعیب ملک اور عمر امین کے درمیان 79 رنز کی اہم شراکت قائم ہوئی۔ عمر امین نے 42 گیندوں پر 58 رنز کی شاندار اننگز کھیلی جبکہ شعیب ملک نے 34 گیندوں پر ناقابل شکست 46 رنز بنائے۔
اختتامی اوورز میں آصف علی نے 11 گیندوں پر 23 رنز کی برق رفتار اننگز کھیلی جس میں دو چھکے اور دو چوکے شامل تھے، جبکہ عامر یامین نے بھی 4 گیندوں پر 11 رنز بنا کر اسکور کو تقویت دی۔ جنوبی افریقا کی جانب سے ڈوان اولیویئر نے 2 وکٹیں حاصل کیں۔
جواب میں جنوبی افریقی ٹیم 199 رنز کے ہدف کے تعاقب میں 20 اوورز میں 9 وکٹوں کے نقصان پر 167 رنز ہی بنا سکی۔ مورنے وین ویک نے 20 گیندوں پر 44 رنز بنائے، جبکہ وین پرنیل نے 21 رنز اور کرس مورس نے 10 رنز اسکور کیے۔
پاکستان کی جانب سے سہیل تنویر اور محمد حفیظ نے دو، دو وکٹیں حاصل کیں، جبکہ رومان رئیس، شعیب ملک، سہیل خان، وہاب ریاض اور عماد وسیم نے ایک، ایک کھلاڑی کو آؤٹ کیا۔
یہ پاکستان چیمپئنز کی ایونٹ میں دوسری کامیابی تھی۔ اس سے قبل انہوں نے انگلینڈ کو شکست دی تھی، جبکہ بھارت کے خلاف میچ منسوخ کر دیا گیا تھا۔
ذرائع کے مطابق بھارتی کھلاڑیوں، جن میں شیکھر دھون، یوسف پٹھان، عرفان پٹھان اور ہربجھن سنگھ شامل تھے، نے شاہد آفریدی کی شمولیت پر اعتراض کرتے ہوئے میچ کھیلنے سے انکار کیا، جس کے بعد میچ منسوخ کر دیا گیا۔
پاکستان چیمپئنز اب اپنا اگلا مقابلہ ویسٹ انڈیز چیمپئنز کے خلاف آج کھیلے گا، جس میں ایک اور کامیابی کی امید کی جا رہی ہے۔
