خیبرپختونخوا کے عوام کے لیے موسم کی صورتحال ایک بار پھر تشویش ناک ہو گئی ہے۔
صوبائی ڈیزاسٹر مینجمنٹ اتھارٹی نے 7 ستمبر سے 9 ستمبر تک شدید بارشوں، آندھی اور گرج چمک کے سلسلے کی پیشگوئی کرتے ہوئے صوبے بھر میں ہائی الرٹ جاری کر دیا ہے۔
پی ڈی ایم اے کے مطابق خیبرپختونخوا کے مختلف علاقوں میں وقفے وقفے سے موسلادھار بارشیں متوقع ہیں جبکہ بعض مقامات پر آندھی اور گرج چمک کے ساتھ شدید بارش کا امکان ہے۔
موسمی صورتحال کے پیش نظر متعلقہ ضلعی انتظامیہ اور تمام ریسکیو اداروں کو الرٹ رہنے کی ہدایت جاری کر دی گئی ہے۔
گلیات، مانسہرہ، کوہستان، کولائی پالس، ایبٹ آباد، بونیر، باجوڑ، بٹگرام، ہنگو، تورغر، ہری پور، کرک، چترال، دیر، سوات اور شانگلہ میں تیز بارش کا امکان ہے۔
خیبر، کوہاٹ، نوشہرہ، صوابی، مردان، کرم، لکی مروت، ملاکنڈ، مہمند، اورکزئی، بنوں، وزیرستان اور ٹانک میں تیز بارش کی پیشگوئی کی گئی ہے ، مقامی نالوں، برساتی چشموں اور دریاؤں میں اچانک طغیانی یعنی فلیش فلڈ کا خطرہ موجود ہے۔
پی ڈی ایم اے کے مطابق پہاڑی علاقوں میں لینڈ سلائیڈنگ جبکہ شہری اور نشیبی علاقوں میں اربن فلڈنگ کا خدشہ بھی ظاہر کیا گیا ہے۔
یہ بھی پڑھیں: مون سون بارشوں کے دسویں مرحلے کی پیشگوئی، خیبرپختونخوا میں لینڈ سلائیڈنگ کا خطرہ
تیز ہواؤں اور گرج چمک کے باعث کمزور مکانات، بجلی کے کھمبے، اشتہاری بورڈز اور سولر پینلز کو نقصان پہنچنے کا اندیشہ ہے، جس کے پیش نظر انتظامیہ کو احتیاطی اقدامات کی ہدایت دی گئی ہے۔
