وفاقی حکومت نے سرکاری ملازمین کے لیے ریٹائرمنٹ کے بعد بناؤلنٹ فنڈ کے تحت دی جانے والی رقوم کی پالیسی میں تبدیلی کا فیصلہ کر لیا ہے، جس کے تحت ملازمین کو ان کے گریڈ کے مطابق 5 لاکھ سے 15 لاکھ روپے تک دیے جائیں گے۔
نجی ٹی وی چینل (ہم نیوز )کے مطابق یہ فیصلہ قومی اسمبلی کی قائمہ کمیٹی برائے کابینہ سیکرٹریٹ کے اجلاس میں کیا گیا، جس کی صدارت ملک ابرار احمد نے کی۔
اجلاس کے دوران بناؤلنٹ فنڈ حکام نے کمیٹی کو بریفنگ دیتے ہوئے بتایا کہ نئی پالیسی کے مطابق گریڈ 1 سے 10 تک کے ملازمین کو ریٹائرمنٹ پر 5 لاکھ روپے دیے جائیں گے۔گریڈ 11 سے 15 کے ملازمین کو 10 لاکھ روپے ادا کیے جائیں گے۔گریڈ 16 اور اس سے اوپر کے ملازمین کو ریٹائرمنٹ پر 15 لاکھ روپے فراہم کیے جائیں گے۔
بناؤلنٹ فنڈ حکام کے مطابق نئی پالیسی کے مالی اثرات جانچنے کے لیے ایک ماہر فرم کی خدمات حاصل کر لی گئی ہیں، جو اس عمل کی ٹائم لائن بھی فراہم کرے گی۔
اجلاس کے دوران پیپلز پارٹی کے رکن آغا رفیع اللہ نے تنقید کرتے ہوئے کہا کہ ’’وفاقی حکومت افسران کی ریٹائرمنٹ کے بعد ان کے مرنے کا انتظار کرتی ہے۔‘‘ ان کا کہنا تھا کہ بناؤلنٹ فنڈ سے بروقت ادائیگیاں ہونی چاہییں تاکہ ملازمین کو ان کی زندگی میں فائدہ حاصل ہو۔
قائمہ کمیٹی نے بناؤلنٹ فنڈ کو ہدایت کی کہ وہ نئی پالیسی کے مالی اثرات کا تفصیلی جائزہ 90 دن کے اندر پیش کرے۔
