بنوں :محکمہ انسدادِ دہشت گردی (سی ٹی ڈی) نے خیبر پختونخوا کے ضلع بنوں میں اہم کارروائی کرتے ہوئے 2 انتہائی مطلوب دہشت گردوں کو ہلاک کردیا۔
سی ٹی ڈی ترجمان کے مطابق مارے جانے والے دہشت گردوں میں ایک خطرناک ملزم خالد بھی شامل ہے، جو 2023 میں سی ٹی ڈی اور پولیس اہلکاروں پر متعدد حملوں میں ملوث تھا۔
خالد کو 4 پولیس اہلکاروں کی شہادت کے واقعے کا ماسٹر مائنڈ بھی قرار دیا گیا ہے۔
ترجمان کا کہنا تھا کہ دہشت گردوں کے قبضے سے 2 کلاشنکوف، 6 میگزین اور 2 دستی بم برآمد کر لیے گئے ہیں۔
یہ بھی پڑھیں : کابل حملہ: ٹی ٹی پی سربراہ نور ولی محسود کی ہلاکت کی تصدیق ہو گئی ہے، متعدد افغان صحافیوں کا دعوی
کارروائی کے دوران دہشت گردوں کے چند ساتھی فرار ہونے میں کامیاب ہوگئے جن کی تلاش کے لیے سرچ آپریشن جاری ہے۔
سی ٹی ڈی نے واضح کیا ہے کہ دہشت گردی کے مکمل خاتمے تک ایسے آپریشنز جاری رہیں گے، اور عوام سے بھی اپیل کی ہے کہ مشکوک سرگرمیوں کی فوری اطلاع متعلقہ حکام کو دیں۔
