وزیراعظم شہباز شریف نے جنوبی افریقہ اور پاکستان کی کرکٹ ٹیموں کے اعزاز میں خصوصی عشائیے کا اہتمام کیا۔
وزیراعظم شہبازشریف نے گفتگو کرتے ہوئے کہا کہ جنوبی افریقہ کی ٹیم کا پاکستان میں خیرمقدم کرتے ہوئے خوشی محسوس ہو رہی ہے اور دونوں ممالک کے درمیان تعلقات ہر سطح پر مضبوط ہیں جن میں کرکٹ کا شعبہ بھی شامل ہے۔
وزیراعظم نے پاکستان اور جنوبی افریقہ کے تمام کھلاڑیوں سے ملاقات کی اور اس موقع پر کہا کہ پاک جنوبی افریقہ کرکٹ سیریز کھیلوں کے ذریعے باہمی احترام اور گہرے تعلقات کی واضح علامت ہے۔
وزیراعظم نے مزید کہا کہ جنوبی افریقہ نے کرکٹ کے بہت سے عظیم کھلاڑی پیدا کیے ہیں اور پاکستان کے کرکٹرز نے بھی اپنی شاندار کارکردگی سے ملک کا نام روشن کیا ہے،انہوں نے کہا امید ہے کہ پاکستان کی ٹیم ماضی کی طرح بہترین کھیل پیش کرے گی۔
وزیراعظم شہباز شریف نے پاکستان کرکٹ بورڈ کے چیئرمین محسن نقوی کی صلاحیتوں پر اعتماد ظاہر کرتے ہوئے کہا کہ کرکٹ محض کھیل نہیں بلکہ مختلف قوموں کے عوام کے درمیان تعلقات کو مضبوط کرنے کا ذریعہ بھی ہے۔
یہ بھی پڑھیں: جنوبی افریقہ کا ٹی ٹونٹی سکواڈ پاکستان پہنچ گیا
وزیراعظم شہبازشریف نے کہا کہ یہ کھیل بھائی چارے اور امن کو فروغ دیتا ہے اور کرکٹ کی اصل روح کو برقرار رکھنا بہت ضروری ہے۔
