وزیراعظم شہباز شریف آج سعودی عرب روانہ، FII9 کانفرنس میں پاکستان کے اعلیٰ سطح وفد کی قیادت کریں گے
تفصیلات کے مطابق وزیراعظم محمد شہباز شریف آج سعودی ولی عہد و وزیر اعظم شہزادہ محمد بن سلمان کی دعوت پر سعودی عرب کے تین روزہ دورے کے لیے ریاض پہنچیں گے۔ دورے کے دوران وزیراعظم نویں مستقبل سرمایہ کاری کانفرنس (FII9) میں پاکستان کے اعلیٰ سطح وفد کی قیادت کریں گے۔
وفد میں نائب وزیراعظم و وزیر خارجہ سینیٹر اسحاق ڈار کے علاوہ کابینہ کے دیگر سینئر وزرا بھی شامل ہیں۔ عالمی سطح کی اس کانفرنس میں دنیا بھر کے رہنما، سرمایہ کار، پالیسی ساز اور ماہرین شرکت کریں گے۔ رواں برس کانفرنس کا موضوع ہے: ’’خوشحالی کی کنجی، ترقی کی نئی سرحدوں کا افتتاح‘‘۔ اس دوران جدت، پائیداری، اقتصادی شمولیت اور عالمی جغرافیائی تبدیلیوں جیسے اہم موضوعات پر تفصیلی غور کیا جائے گا۔
وزیراعظم شہباز شریف اپنے دورے کے دوران سعودی قیادت سے ملاقاتیں بھی کریں گے، جن میں تجارت، سرمایہ کاری، توانائی اور افرادی وسائل کے شعبوں میں تعاون بڑھانے کے امور پر بات چیت متوقع ہے۔ علاوہ ازیں، علاقائی اور عالمی امور پر بھی تبادلۂ خیال کیا جائے گا۔
دورے کے دوران وزیراعظم دیگر ممالک کے سربراہان اور بین الاقوامی تنظیموں کے نمائندوں سے بھی ملاقاتیں کریں گے تاکہ پاکستان کی سرمایہ کاری کی صلاحیت، پائیدار ترقی کے منصوبوں اور عالمی شراکت داری کے امکانات کو اجاگر کیا جا سکے۔ یہ دورہ پاکستان کے اقتصادی سفارت کاری کے عزم اور سرمایہ کاری، ٹیکنالوجی و پائیدار ترقی کے شعبوں میں حکمت عملی کا مظہر ہے۔
