وزیراعظم شہباز شریف نے ستائیس ویں آئینی ترمیم کے تحت وزیراعظم کو فوجداری مقدمات سے استثنیٰ دینے والی ترمیمی شق واپس لینے کی ہدایت کر دی ہے۔
سوشل میڈیا پر جاری کیے گئے پیغام میں وزیراعظم نے بتایا کہ ان کی پارٹی کے کچھ سینیٹرز نے سینیٹ میں وزیراعظم کے استثنیٰ کے حوالے سے ترمیمی شق پیش کی تھی، جو کابینہ سے منظور شدہ مسودے میں شامل نہیں تھی۔
وزیراعظم شہباز شریف نے سینیٹرز کے خلوص کا شکریہ ادا کرتے ہوئے ہدایت کی کہ یہ ترمیم فی الفور واپس لی جائے۔ انہوں نے واضح کیا کہ منتخب وزیراعظم قانون اور عوام کی عدالت میں جوابدہ ہے، اور کسی قسم کا استثنیٰ اس کے اصول کے مطابق نہیں ہے۔
اس اقدام سے وزیراعظم نے آئینی عمل کی پاسداری اور شفافیت کو یقینی بنانے کا عندیہ دیا ہے۔
