پاکستان تحریک انصاف (پی ٹی آئی) کےپارلیمانی وفد نے گورنر ہاؤس پشاور میں گورنر خیبرپختونخوا فیصل کریم کنڈی سے ملاقات کی۔
وفد میں اسپیکر خیبرپختونخوا اسمبلی بابر سلیم سواتی، سابق اسپیکر قومی اسمبلی اسد قیصر، اراکین قومی اسمبلی جنید اکبر، محبوب شاہ، صبغت اللہ، عاطف خان، ڈاکٹر امجد، سلیم الرحمٰن اور دیگر رہنما شامل تھے۔
پی ٹی آئی وفد نے گورنر خیبرپختونخوا کو صوبائی اسمبلی میں منعقد ہونے والے امن جرگے میں شرکت کی باضابطہ دعوت دی۔
یہ بھی پڑھیں : بنوں: دو روز قبل اغوا ہونے والے ایس ایچ او عابد کو شہید کردیا گیا
وفد کا کہنا تھا کہ صوبے کے آئینی سربراہ کے طور پر گورنر کی شرکت اور رہنمائی امن جرگے کے لیے باعثِ فخر ہوگی۔ وفد نے کہا کہ صوبے کے امن، ترقی اور خوشحالی کے لیے تمام سیاسی قوتوں کو متحد ہو کر آگے بڑھنا چاہیے۔
گورنر خیبرپختونخوا فیصل کریم کنڈی نے وفد کو امن جرگے میں شرکت کی مکمل یقین دہانی کراتے ہوئے کہا کہ صوبائی حکومت اور تمام سیاسی جماعتوں کے ساتھ مل بیٹھنا ان کے لیے باعثِ اعزاز ہے۔
انہوں نے کہا کہ صوبے کے امن اور مجموعی ترقی کے لیے ان کا تعاون ہمیشہ صوبائی حکومت کے ساتھ رہے گا۔ فیصل کریم کنڈی نے اسپیکر صوبائی اسمبلی اور صوبائی حکومت کی جانب سے قیام امن کے لیے امن جرگہ بلانے کے اقدام کو مثبت اور حوصلہ افزا قرار دیا۔
یہ بھی پڑھیں : جے یو آئی کے ارکان قومی اسمبلی 27ویں ترمیم کی مخالفت میں ووٹ دیں، مولانا فضل الرحمان
گورنر نے کہا کہ بطور وفاقی نمائندہ وہ صوبے کے حقوق کے تحفظ اور ترقی کے لیے تمام سیاسی جماعتوں کے ساتھ مل کر کام کرنے کے لیے پرعزم ہیں۔ ان کا کہنا تھا کہ موجودہ حالات اس بات کے متقاضی ہیں کہ ہم سب اتحاد اور اتفاق کے ساتھ آگے بڑھیں تاکہ صوبے میں امن و استحکام کو یقینی بنایا جا سکے۔
