کم پڑھے لکھے اور بے روزگار افراد کے لیے خوشخبری آگئی ہے کیونکہ خیبرپختونخوا حکومت نے اسکولوں میں چوکیدار کی خالی آسامیوں پر بھرتیوں کا اعلان کر دیا ہے۔
تفصیلات کے مطابق صوبے کے 28 اضلاع میں مجموعی طور پر 2,800 نئی نوکریاں دی جائیں گی، جس سے ہزاروں افراد کو روزگار کے مواقع میسر آئیں گے۔ محکمہ خزانہ خیبرپختونخوا کے مطابق اسکولوں میں خالی آسامیوں کو پُر کرنے کے لیے بھرتیوں کی باضابطہ منظوری دے دی گئی ہے۔ تقرریاں اشتہار، مقابلے اور میرٹ کی بنیاد پر کی جائیں گی، تاکہ شفاف اور منصفانہ طریقے سے اہل امیدواروں کا انتخاب کیا جا سکے۔
ضلع مانسہرہ میں سب سے زیادہ 377 آسامیوں کا اعلان کیا گیا ہے، جبکہ بنوں کے لیے 263، مردان کے لیے 256، پشاور کے لیے 162، لکی مروت کے لیے 160 اور ایبٹ آباد کے لیے 154 آسامیوں کی منظوری دی گئی ہے۔ دیگر اضلاع میں بھی مناسب تعداد میں آسامیاں فراہم کی جائیں گی تاکہ ہر علاقے کے مستحق افراد اس سے فائدہ اٹھا سکیں۔
ماہرین کا کہنا ہے کہ یہ اقدام صوبے میں بے روزگاری کے خاتمے اور کم پڑھے لکھے افراد کو باعزت روزگار فراہم کرنے میں مددگار ثابت ہوگا۔ حکومت نے شہریوں اور درخواست دہندگان سے کہا ہے کہ وہ بھرتیوں کے لیے جاری کیے جانے والے اشتہارات پر توجہ دیں اور بروقت درخواست دیں تاکہ یہ سنہری موقع ضائع نہ ہو۔
یہ نوکریاں نہ صرف معاشی طور پر مددگار ثابت ہوں گی بلکہ عوام میں اعتماد اور امید کی کرن بھی جگائیں گی، خاص طور پر ان لوگوں کے لیے جو تعلیم یا مہارت کی کمی کے باعث روزگار کے مواقع سے محروم تھے۔
