وفاقی حکومت نے آئندہ 15 روز کے لیے پٹرولیم مصنوعات کی قیمتیں برقرار رکھنے کا فیصلہ کیا ہے اور لیوی میں اضافے کے باعث عوام کو پٹرول اور ڈیزل پر ملنے والے ریلیف سے محروم کر دیا ہے۔
وزارت خزانہ کی جاری کردہ نوٹیفکیشن کے مطابق پٹرول کی قیمت 253 روپے 17 پیسے فی لٹر اور ڈیزل کی قیمت 257 روپے 8 پیسے فی لٹر برقرار رکھی گئی ہے۔
واضح رہے کہ یکم جنوری کو حکومت نے پٹرول کی قیمت میں 10 روپے 28 پیسے اور ہائی سپیڈ ڈیزل کی قیمت میں 8 روپے 57 پیسے کمی کی تھی۔
اب لیوی میں اضافہ کر کے پٹرول پر فی لٹر 4 روپے 65 پیسے اور ڈیزل پر 80 پیسے کا ریلیف ختم کر دیا گیا ہے۔
نوٹیفکیشن کے مطابق پٹرول پر لیوی 79 روپے 62 پیسے سے بڑھا کر 84 روپے 27 پیسے اور ڈیزل پر 75 روپے 41 پیسے سے بڑھا کر 76 روپے 21 پیسے فی لٹر کر دی گئی ہے۔
یہ بھی پڑھیں: پیٹرولیم مصنوعات کی قیمتوں میں کمی ہوگی یا اضافہ ؟اہم خبر آگئی
حکومت کی جانب سے قیمتیں کم کرنے کے بجائے برقرار رکھنے اور لیوی میں اضافہ کرنے کے فیصلے سے عوام پر اضافی بوجھ پڑنے کا خدشہ ظاہر کیا جا رہا ہے۔
