حکومت بلوچستان نے صوبے بھر میں امن و امان کی خراب صورتحال کے پیشِ نظر ایک ماہ کے لیے دفعہ 144 نافذ کر دی ہے۔ محکمہ داخلہ بلوچستان کے جاری کردہ اعلامیے کے مطابق، اس پابندی کے تحت صوبے میں اسلحہ کی نمائش اور استعمال پر مکمل پابندی ہوگی جبکہ ڈبل سواری پر بھی پابندی عائد کر دی گئی ہے۔
اعلامیے میں مزید کہا گیا ہے کہ کالے شیشوں والی گاڑیوں، غیر رجسٹرڈ گاڑیوں کے استعمال، پانچ یا زائد افراد کے اجتماعات و جلوس، اور چہرہ ڈھانپنے پر بھی پابندی ہوگی۔ یہ اقدامات فوری طور پر نافذ العمل ہوں گے، اور پابندیوں کی خلاف ورزی کرنے والوں کے خلاف قانون کے مطابق سخت کارروائی کی جائے گی۔
حکومت بلوچستان نے واضح کیا ہے کہ یہ اقدامات صوبے میں امن و امان قائم رکھنے، شہریوں کی حفاظت یقینی بنانے، اور کسی بھی ناخوشگوار واقعے سے بچاؤ کے لیے کیے گئے ہیں۔ صوبے کے تمام اضلاع میں متعلقہ حکام کو ہدایات جاری کر دی گئی ہیں تاکہ پابندیوں پر سختی سے عمل درآمد کو یقینی بنایا جا سکے۔
محکمے کے ذرائع کے مطابق دفعہ 144 کے نفاذ سے صوبے میں کشیدگی کم کرنے اور عوامی تحفظ کو بہتر بنانے میں مدد ملے گی۔ شہریوں کو ہدایت کی گئی ہے کہ وہ ہجوم اور غیر قانونی اجتماعات سے گریز کریں اور حکومتی ہدایات پر عمل کریں۔
