سینئر صحافی اور تجزیہ کار حماد حسن نے خیبر پختونخوا میں تحریک انصاف کے موجودہ دورِ حکومت کے حوالے سے چونکا دینے والے انکشافات کرتے ہوئے دعویٰ کیا ہے کہ صوبے میں کرپشن نے گزشتہ 12 برسوں کے تمام ریکارڈ توڑ دیے ہیں۔
حماد حسن کے مطابق ایشین ڈیویلپمنٹ بینک (ADB) کے فنڈز سے چلنے والے ترقیاتی پروگرام RRDP میں 120 ارب روپے کی خطیر رقم کی خرد برد سامنے آئی ہے۔
انہوں نے انکشاف کیا کہ بااثر حلقوں کے قریبی سمجھے جانے والے ایک معمولی ایس ڈی او (SDO) عمیر جان کو، جن کا اپنا تعلق محض چار ارب روپے کے ترقیاتی بجٹ والے علاقے سے ہے، 120 ارب روپے کے وسیع فنڈز کی نگرانی سونپی گئی ہے جو کہ انتظامی اور مالیاتی اصولوں کی کھلی خلاف ورزی ہے۔
حماد حسن نے وسائل کی غیر منصفانہ تقسیم پر سوال اٹھاتے ہوئے مزید دعویٰ کیا کہ چالیس لاکھ آبادی والے ایک مخصوص شہر کے لیے تقریباً 200 ارب روپے کے فنڈز مختص کیے گئے ہیں جو شفافیت پر سنگین سوالات کھڑے کرتے ہیں۔
ان کا کہنا تھا کہ صوبے میں جاری اس مبینہ لوٹ مار نے ماضی کے تمام ریکارڈ پیچھے چھوڑ دیے ہیں اور آنے والے دنوں میں اس سے بھی بڑے حقائق سامنے آنے والے ہیں جو صوبائی حکومت کے لیے بڑی مشکلات کا باعث بن سکتے ہیں۔
