پشاور: واٹس ایپ گروپ سے نکالے جانے پر مشتعل شخص نے ایڈمن کو قتل کر دیا، پولیس نے ملزم کے خلاف قتل کا مقدمہ درج کر لیا۔
تفصیلات کے مطابق پشاور میں جمعرات کی شام ایک افسوسناک واقعہ پیش آیا، جہاں مشتا ق احمد کو مبینہ طور پر اشفاق نامی شخص نے گولی مار کر قتل کر دیا۔ پولیس دستاویزات کے مطابق مقتول مشتا ق احمد نے اشفاق کو ایک کمیونٹی واٹس ایپ گروپ سے نکال دیا تھا، جس پر دونوں کے درمیان تلخ کلامی ہوئی۔
مقتول کے بھائی کے بیان کے مطابق دونوں نے ملاقات کر کے معاملہ سلجھانے کا فیصلہ کیا، لیکن اشفاق مسلح ہو کر آیا اور مشتا ق احمد پر فائرنگ کر دی، جس سے وہ موقع پر ہی جاں بحق ہو گیا۔
پولیس کا کہنا ہے کہ اشفاق کے خلاف قتل کا مقدمہ درج کر لیا گیا ہے اور مزید تفتیش جاری ہے۔ ماہرین کے مطابق ایسے واقعات میں اسلحے کی آسان دستیابی، قبائلی روایات اور قانون نافذ کرنے والے اداروں کی کمزوری جیسے عوامل شامل ہوتے ہیں۔
یہ بھی پڑھیں: پشاور: نامعلوم افراد کی فائرنگ سے ڈاکٹر عبدالباسط قتل
