اسلام آباد: صدر مملکت آصف علی زرداری نے قومی اسمبلی اور سینیٹ کے اجلاس طلب کرنے کی منظوری دے دی ہے، جس کے بعد وفاقی بجٹ پیش کرنے کی پارلیمانی کارروائی کے لیے اہم پیش رفت سامنے آئی ہے۔
اعلامیے کے مطابق صدر مملکت نے قومی اسمبلی کا اجلاس 10 جون 2026 کو شام 5 بجے طلب کرنے کی منظوری دی ہے، جبکہ سینیٹ کا اجلاس بھی اسی روز شام 4 بجے منعقد ہوگا۔ دونوں ایوانوں کے اجلاس پارلیمنٹ ہاؤس اسلام آباد میں اپنے مقررہ اوقات پر منعقد کیے جائیں گے۔
پارلیمانی ذرائع کے مطابق ان اجلاسوں میں آئندہ مالی سال کے وفاقی بجٹ سمیت دیگر اہم قومی امور پر غور کیا جائے گا۔ حکومت کی جانب سے وفاقی بجٹ 12 جون کو قومی اسمبلی میں پیش کیے جانے کا امکان ہے، جس کے لیے تیاریاں آخری مراحل میں داخل ہو چکی ہیں۔
وفاقی وزیر پارلیمانی امور طارق فضل چوہدری نے بھی اس بات کی تصدیق کی ہے کہ بجٹ پیش کرنے کے حوالے سے حکومتی سطح پر تیاریاں جاری ہیں اور موجودہ شیڈول کے مطابق وفاقی بجٹ 12 جون کو پیش کیا جا سکتا ہے۔
یہ بھی پڑھیں : پی ٹی آئی نے گلگت بلتستان انتخابات میں کتنی سیٹیں جیتی ہیں؟ شیخ وقاص اکرم کی آڈیو لیک نے حقیقت کھول دی
ذرائع کا کہنا ہے کہ بجٹ اجلاس سے قبل پارلیمنٹ کے دونوں ایوانوں کے اجلاس بلانے کا مقصد آئینی اور پارلیمانی تقاضے مکمل کرنا ہے تاکہ بجٹ کی منظوری اور اس پر بحث کے عمل کو بروقت آگے بڑھایا جا سکے۔
واضح رہے کہ وفاقی بجٹ پیش کرنے کی تاریخ میں اس سے قبل دو مرتبہ تبدیلی کی جا چکی ہے، جس کے باعث بجٹ شیڈول کے حوالے سے مختلف قیاس آرائیاں بھی سامنے آتی رہی ہیں۔ تاہم اب حکومت کی جانب سے 12 جون کو بجٹ پیش کرنے کی تیاریوں کو حتمی شکل دی جا رہی ہے۔
سیاسی و پارلیمانی حلقوں کی نظریں اب آئندہ چند روز میں ہونے والے اجلاسوں اور وفاقی بجٹ کے اہم اعلانات پر مرکوز ہیں، جن سے ملکی معیشت اور آئندہ مالی سال کی حکومتی ترجیحات کا تعین ہوگا۔
