اسلام آباد: ملک بھر سے پولیو کے خاتمے کے لیے جاری کوششوں کے باوجود مختلف اضلاع کے ماحولیاتی نمونوں میں ایک مرتبہ پھر پولیو وائرس کی موجودگی سامنے آئی ہے، جس کے بعد متعلقہ اداروں نے نگرانی اور حفاظتی اقدامات مزید مؤثر بنانے پر زور دیا ہے۔
نیشنل ایمرجنسی آپریشنز سینٹر (این ای او سی) کے مطابق مئی 2026 کے دوران ملک کے مختلف اضلاع سے حاصل کیے گئے سیوریج کے نمونوں کے تجزیے میں سندھ، بلوچستان اور خیبرپختونخوا کے متعدد علاقوں میں پولیو وائرس کی تصدیق ہوئی ہے۔
رپورٹ کے مطابق سندھ کے اضلاع کشمور، قمبر، کراچی ضلع شرقی اور کراچی ضلع غربی کے ماحولیاتی نمونے پولیو وائرس کے لیے مثبت آئے ہیں۔
اسی طرح بلوچستان کے ضلع ڈیرہ بگٹی اور چمن سے حاصل کیے گئے سیوریج کے نمونوں میں بھی پولیو وائرس کی موجودگی کی تصدیق ہوئی ہے۔
یہ بھی پڑھیں : آزاد کشمیر انتخابات سے قبل ن لیگ کو بڑا دھچکا، اہم رہنما نے پارٹی چھوڑ دی
خیبرپختونخوا میں پشاور اور بنوں کے سیوریج نمونے بھی پولیو وائرس کے لیے مثبت قرار دیے گئے ہیں، جس کے بعد متعلقہ علاقوں میں نگرانی مزید سخت کرنے کی ضرورت پر زور دیا جا رہا ہے۔
دوسری جانب این ای او سی کے مطابق پنجاب، آزاد کشمیر، گلگت بلتستان اور وفاقی دارالحکومت اسلام آباد سے حاصل کیے گئے تمام ماحولیاتی نمونے پولیو وائرس سے پاک قرار دیے گئے ہیں، جہاں کسی بھی نمونے میں وائرس کی موجودگی نہیں پائی گئی۔
حکام کا کہنا ہے کہ ملک سے پولیو کے مکمل خاتمے کے لیے ماحولیاتی نگرانی، بروقت ویکسینیشن اور انسداد پولیو مہمات کا تسلسل انتہائی ضروری ہے۔
