مانسہرہ کے سیاحتی علاقے موسیٰ دا مصلہ سے لاپتہ ہونے والے آئرلینڈ کے شہری الیگزینڈر کی نعش پانچ روز تک جاری رہنے والے سرچ آپریشن کے بعد پراچہ کٹھہ کی گہری کھائی سے برآمد کر لی گئی ہے۔
ڈی آئی جی ہزارہ ناصر محمود ستی کے مطابق آئرش سیاح الیگزینڈر 29 اگست 2026 کو اپنے ایک دوست کے ہمراہ موسیٰ دا مصلہ کی جانب روانہ ہوا تھا۔ واپسی کے دوران دونوں ایک دوسرے سے جدا ہو گئےجس پر الیگزینڈر کے دوست نے 30 اگست کو تھانہ نواز آباد مانسہرہ میں اس کی گمشدگی کی رپورٹ درج کرائی۔
اطلاع ملتے ہی ڈی آئی جی ہزارہ ناصر محمود ستی کی خود نگرانی اور عملی قیادت میں ایک نگران سرچ آپریشن شروع کیا گیا۔ اس آپریشن میں 200 سے زائد پولیس اہلکاروں، ریسکیو 1122، محکمہ جنگلات اور مقامی افراد پر مشتمل ٹیموں نے حصہ لیا۔
دشوار گزار پہاڑی راستوں، گھنے جنگلات اور انتہائی نامساعد موسمی حالات کے باوجود ٹیموں نے دن رات تلاش جاری رکھی۔
ابتدائی معلومات کے مطابق الیگزینڈر واپسی کے دوران خراب موسم کی وجہ سے حادثاتی طور پر پراچہ کٹھہ کی گہری کھائی میں جا گرا جس کے نتیجے میں اس کی موت واقع ہوئی۔ نعش کو قانونی و ضابطے کی کارروائی کے لیے کنگ عبداللہ ہسپتال مانسہرہ منتقل کیا گیا ہے۔
ڈی آئی جی ہزارہ نے واقعہ کو انتہائی افسوسناک قرار دیتے ہوئے بتایا کہ متوفی کی فیملی پاکستان پہنچ چکی ہے اور پولیس ان کے ساتھ مسلسل رابطے میں ہے۔
یہ بھی پڑھیں : فوربز نے دنیا کے 10 امیر ترین افراد کی فہرست جاری کردی
انہوں نے سرچ ٹیموں کی پیشہ ورانہ صلاحیتوں کو سراہتے ہوئے اعادہ کیا کہ ہزارہ پولیس ملکی و غیر ملکی سیاحوں کے تحفظ کے لیے تمام ممکنہ اقدامات کے لیے کوشاں ہے۔
