پنجاب کی سینئر صوبائی وزیر مریم اورنگزیب نے کہا ہے کہ وزیراعلیٰ مریم نواز شریف کے دہشت گردی کے خلاف اٹھائے گئے اقدامات سے متعلق بیان کو سوشل میڈیا پر جان بوجھ کر توڑ مروڑ کر پیش کرنا اور اسے منفی رنگ دینا انتہائی قابلِ مذمت ہے۔
سماجی رابطے کی ویب سائٹ پر جاری اپنے بیان میں مریم اورنگزیب کا کہنا تھا کہ دراصل وزیراعلیٰ پنجاب نے دہشت گردوں کی ایک صوبے سے دوسرے صوبے میں ہونے والی نقل و حرکت اور اس سے پیدا ہونے والے سکیورٹی خدشات پر بات کی تھی، مگر سیاسی حسد میں مبتلا عناصر نے اس گفتگو کا اصل تناظر مسخ کر کے اسے بلاوجہ صوبائیت اور لسانیت کا رنگ دینے کی گھٹیا کوشش کی۔
انہوں نے دوٹوک الفاظ میں واضح کیا کہ مریم نواز شریف پاکستان کے تمام صوبوں اور وہاں بسنے والی تمام اکائیوں اور قومیتوں کا دل سے احترام کرتی ہیں۔
ان کا کہنا تھا کہ دہشت گردی جیسے حساس قومی مسئلے کو صوبائی تعصب سے جوڑنا انتہائی نچلی سطح کی سیاست ہے۔
یہ بھی پڑھیں: کیا وزیراعلیٰ خیبر پختونخوا سہیل آفریدی کے سٹریٹ منومنٹ کو کراچی میں بریک لگ گیا؟ سندھ حکومت کا بڑا فیصلہ
سینئر صوبائی وزیر نے مزید تنقید کرتے ہوئے کہا کہ یہ مفاد پرست عناصر صرف اپنے سیاسی پوائنٹ سکورنگ اور فوائد کے لیے قوم کے اندر تقسیم کے بیج بونا چاہتے ہیں، لیکن ملک میں دہشت گردی کے خلاف جاری پختہ عزم اور اقدامات کو متنازع بنانے کی ہر سازش کو ناکام بنایا جائے گا۔
