پاکستان کے کرکٹرز امام الحق اور محمد رضوان فٹنس ٹیسٹ نہ دینے کے باعث پریزیڈنٹ ٹرافی گریڈ ون میں شرکت نہیں کرسکیں گے۔
ذرائع کے مطابق فرسٹ کلاس کرکٹ کھیلنے کیلئے پاکستان کرکٹ بورڈ (پی سی بی) نے کھلاڑیوں کیلئے فٹنس ٹیسٹ رپورٹس جمع کرانا لازمی قرار دیا تھا، تاہم امام الحق اور محمد رضوان نے فٹنس ٹیسٹ نہیں دیا۔
امام الحق نے او جی ڈی سی ایل کی ٹیم کی قیادت کرتے ہوئے کل سے پی ٹی وی کے خلاف میچ کھیلنا تھا، جبکہ شان مسعود کی عدم موجودگی میں محمد رضوان کو پہلے راؤنڈ میں سوئی گیس کی قیادت کرنا تھی۔ رضوان سوئی گیس کے نائب کپتان ہیں۔
یہ بھی پڑھیں: ڈریسنگ روم لیکس کیس، امام الحق، رضوان این سی سی آئی اے کے سامنے پیش
ذرائع کا کہنا ہے کہ فٹنس ٹیسٹ کی شرط پوری نہ ہونے کے باعث دونوں کھلاڑی پریزیڈنٹ ٹرافی گریڈ ون کے پہلے راؤنڈ میں شرکت نہیں کرسکیں گے۔
پریزیڈنٹ ٹرافی کا آغاز کل سے راولپنڈی، اسلام آباد، ایبٹ آباد اور پشاور میں ہوگا۔
