خیبر پختونخوا کی ایڈوائزری کونسل میں دو خواتین شامل، اہم ذمہ داریاں سونپ دی گئی ہیں۔
خیبر پختونخوا کی ایڈوائزری کونسل میں دو خواتین کو شامل کرتے ہوئے انہیں صحت اور اطلاعات و نشریات کے اہم شعبوں کی ذمہ داریاں سونپی گئی ہیں۔
لیفٹیننٹ جنرل (ر) نگار جوہر خان کو مشیر برائے صحت جبکہ ثمر ہارون بلور کو مشیر برائے اطلاعات و نشریات مقرر کیا گیا ہے۔
لیفٹیننٹ جنرل (ر) نگار جوہر خان پاکستان کی فوجی تاریخ میں نمایاں مقام رکھتی ہیں، وہ پاکستان آرمی میں لیفٹیننٹ جنرل کے عہدے تک پہنچنے والی پہلی خاتون ہیں۔
لیفٹیننٹ جنرل (ر) نگار جوہر نے فوج کے میڈیکل شعبے میں طویل خدمات انجام دیں اور صحت کے شعبے میں وسیع تجربہ رکھتی ہیں۔
یہ بھی پڑھیں: ثمر ہارون بلور کو خیبرپختونخوا میں اہم ذمہ داری مل گئی
لیفٹیننٹ جنرل (ر) نگار جوہر کی تقرری سے خیبر پختونخوا میں صحت عامہ، طبی سہولیات اور ہسپتالوں سے متعلق امور میں ان کے تجربے سے استفادہ کیا جا سکے گا۔
ثمر ہارون بلور کا تعلق مسلم لیگ ن سے ہے اور وہ خیبر پختونخوا کی سیاست میں سرگرم کردار ادا کرتی رہی ہیں، وہ قومی اسمبلی کی رکن بھی ہیں اور عوامی و سیاسی معاملات پر اپنی آواز بلند کرتی رہی ہیں۔ انہیں مشیر برائے اطلاعات و نشریات کی ذمہ داری سونپی گئی ہے، جس کے تحت صوبائی امور سے متعلق معلومات کی فراہمی اور حکومتی مؤقف کی مؤثر ابلاغ کاری اہم ذمہ داریوں میں شامل ہوں گی۔
