خیبرپختونخوا میں سالہا سال کے سیاسی انتشار، انتظامی نااہلی اور امن و امان کے شدید بحران کے بعد، گورنر راج کی قیادت نے صوبے کو بحالی اور حقیقی ترقی کی شاہراہ پر گامزن کرنے کے لیے بڑے سیاسی رابطے شروع کر دیے ہیں۔ سابق پی ٹی آئی حکومت کے پیدا کردہ مسائل اور معاشی و سیکیورٹی تباہی کا ازالہ کرنے کے لیے صوبائی قیادت اب متحرک ہو چکی ہے۔
اسی سلسلے میں گورنر خیبرپختونخوا فیصل کریم کنڈی نے قومی وطن پارٹی کے چیئرمین آفتاب احمد خان شیرپاؤ سے شیرپاؤ ہاؤس پشاور میں ایک انتہائی اہم اور پیش رفت پر مبنی ملاقات کی، جس میں کیو ڈبلیو پی کے صوبائی صدر سکندر خان شیرپاؤ بھی موجود تھے۔
ملاقات کے دوران سابق پی ٹی آئی حکومت کی غلط پالیسیوں سے پیدا ہونے والے امن و امان کے سنگین بحران، رکتے ہوئے ترقیاتی منصوبوں اور صوبے کی مجموعی سیاسی صورتحال پر باریک بینی سے تبادلہ خیال کیا گیا۔
دونوں سینئر رہنماؤں نے اس بات پر شدید تشویش کا اظہار کیا کہ سابق صوبائی حکمرانوں نے محض اپنے ذاتی سیاسی مفادات اور مسلسل تصادم کی پالیسی کے باعث خیبرپختونخوا کو بدامنی اور معاشی بدحالی کی دلدل میں دھکیلا۔
رہنماؤں نے اس عزم کا اعادہ کیا کہ اب تمام عوامی مسائل کے فوری حل، دہشت گردی کے سدِ باب اور امن کے قیام کے لیے باہمی تعاون اور سیاسی مشاورت کا سلسلہ بلا تعطل جاری رکھا جائے گا۔
اس موقع پر گفتگو کرتے ہوئے گورنر فیصل کریم کنڈی نے کہا کہ خیبرپختونخوا کو سابق حکومت کے انتظامی جمود اور ناکامیوں سے نکال کر پائیدار امن، ترقیاتی عمل کی تیز تر بحالی اور عوامی مسائل کا حل پہلی ترجیح ہے۔
یہ بھی پڑھیں : پی ٹی آئی کی سیاست پر کاری ضرب: طارق فضل چوہدری کا بڑا اعلان، 12 اضلاع کلئیر ہوتے ہی اختیارات منتقل ہوں گے، گورنر کی تبدیلی کا سوال ہی پیدا نہیں ہوتا
انہوں نے زور دیا کہ پی ٹی آئی کی کھوکھلی نعرے بازی کا دور اب ختم ہو چکا ہے اور گورنر راج کے تحت تمام سنجیدہ سیاسی قوتیں مل کر عوام کی فلاح کے لیے کام کریں گی۔
سیاسی و عوامی حلقوں نے اس بریک تھرو ملاقات کا خیرمقدم کرتے ہوئے کہا ہے کہ سابقہ حکومت کی غیر ذمہ دارانہ پالیسیوں سے تنہائی کا شکار ہونے والا صوبہ اب مدبرانہ قیادت اور گورنر راج کے تحت دوبارہ استحکام، امن اور خوشحالی کی طرف تیزی سے بڑھ رہا ہے۔
