انسپکٹر جنرل پولیس خیبرپختونخوا ذوالفقار حمید نے قبائلی اضلاع میں پولیس سروسز کی فراہمی کے لیے ایک بڑا قدم اٹھاتے ہوئے پہلے جدید پولیس سہولت مرکز کا افتتاح کر دیا۔ اس مرکز کا مقصد شہریوں کو فوری، باوقار اور ایک چھت تلے متعدد خدمات کی فراہمی ہے۔
افتتاحی تقریب سے خطاب کرتے ہوئے آئی جی ذوالفقار حمید نے کہا کہ ’’یہ سہولت مرکز شہریوں کو تھانوں کے چکر اور ہفتوں کے انتظار سے نجات دلائے گا۔ اب عوام کو کریکٹر سرٹیفکیٹ، فارن ویری فکیشن، ڈرائیونگ اسکول اور لائسنس جیسی سہولیات بآسانی دستیاب ہوں گی۔‘‘
100 کیمروں پر مشتمل ماڈل سیف سٹی بھی فعال
مرکز کے ساتھ 100 سی سی ٹی وی کیمروں پر مشتمل جدید ماڈل سیف سٹی بھی قائم کیا گیا ہے جو سیکیورٹی اور نگرانی کے جدید تقاضے پورے کرے گا۔ آئی جی کا کہنا تھا کہ یہ سیف سٹی نظام ضم اضلاع میں امن و امان برقرار رکھنے میں اہم کردار ادا کرے گا۔
خواتین کے لیے علیحدہ سہولت: ’دا خویندو مرکز‘
پختون روایات اور سماجی اقدار کو مدنظر رکھتے ہوئے خواتین کے لیے علیحدہ ڈیسک ’دا خویندو مرکز‘ بھی قائم کیا گیا ہے، جہاں خواتین شہری باحفاظت اور سہولت سے اپنی خدمات حاصل کر سکیں گی۔
آئی جی پولیس نے کہا کہ ’’ہم پولیسنگ کے نظام میں سہولت، شفافیت اور عوامی اعتماد کی نئی مثال قائم کر رہے ہیں، اور یہ مرکز اس وژن کا عملی نمونہ ہے۔‘‘
مرکز کی نمایاں خصوصیات:
کریکٹر سرٹیفکیٹ اور فارن ویریفیکیشن کی فوری سہولت
ڈرائیونگ اسکول اور لائسنس کے اجرا کی سروس
خواتین کے لیے محفوظ اور باوقار ماحول
ماڈل سیف سٹی کے ذریعے 24/7 نگرانی
عوام کو دفاتر اور تھانوں کے چکر سے نجات
یہ جدید سہولت مرکز خیبرپختونخوا میں پولیسنگ کے نئے دور کی شروعات قرار دیا جا رہا ہے، جہاں عوامی خدمت کو ترجیح اور روایتی مشکلات کا خاتمہ بنیادی مقصد ہے۔
