خیبرپختونخوا کے دارالحکومت پشاور میں ٹریفک پولیس کی گاڑی سے شہری کو گھسیٹے جانے کا لرزہ خیز واقعہ سامنے آیا ہے، جس کی ویڈیو سوشل میڈیا پر وائرل ہونے کے بعد شدید عوامی ردعمل دیکھنے میں آیا۔
یہ افسوسناک واقعہ تجاوزات کے خلاف جاری آپریشن کے دوران اس وقت پیش آیا جب ایک شہری کو حراست میں لینے کی کوشش کے دوران وہ پولیس گاڑی کے ساتھ لٹک گیا اور کئی میٹر تک گھسیٹتا چلا گیا۔ وائرل ویڈیو میں واضح طور پر دیکھا جا سکتا ہے کہ شہری زمین پر گھسیٹ رہا ہے، جبکہ گاڑی اپنی رفتار برقرار رکھتی ہے۔
واقعے کی ویڈیو سامنے آنے کے بعد پولیس حکام نے فوری ایکشن لیتے ہوئے متعلقہ ٹریفک اہلکار کو معطل کر دیا ہے۔ حکام کے مطابق، شہری بعد ازاں گاڑی سے چھلانگ لگا کر فرار ہو گیا جبکہ پولیس اہلکار شہری کو مناسب طریقے سے قابو پانے میں ناکام رہا۔
پشاور پولیس نے مؤقف اختیار کیا ہے کہ معاملے کی تحقیقات جاری ہیں اور جو بھی ذمہ دار پایا گیا، اس کے خلاف سخت کارروائی کی جائے گی۔
عوامی ردعمل:
واقعے پر سوشل میڈیا پر شہریوں کی جانب سے شدید غم و غصے کا اظہار کیا گیا ہے۔ صارفین نے پولیس کے رویے کو ’’ناقابل قبول‘‘ اور’’ظلم کی انتہا‘‘ قرار دیتے ہوئے متعلقہ حکام سے فوری اور شفاف تحقیقات کا مطالبہ کیا ہے۔
