ضلع خیبر کے علاقے باڑہ میں پولیس نے کارروائی کرتے ہوئے کروڑوں روپے مالیت کی منشیات برآمد کرلی اور ایک اسمگلر کو گرفتار کرلیا۔
خیبر پولیس کی جانب سے جاری کردہ پریس ریلیز کے مطابق، ضلعی پولیس افسر (ڈی پی او) رائے مظہر اقبال کی ہدایات پر بارکمبر خیل کے علاقے میں ایک مشکوک ٹریکٹر لوڈر کو روکا گیا۔ تلاشی کے دوران گاڑی سے 125 کلوگرام افیون اور 200 کلوگرام چرس برآمد کی گئی۔ پولیس نے ملزم اقبال خان کو گرفتار کرکے مزید تفتیش کے لیے منتقل کردیا۔
ڈی پی او رائے مظہر اقبال نے پولیس ٹیم کی کارکردگی کو سراہتے ہوئے کہا کہ نوجوان نسل کو منشیات کے زہر سے بچانے کے لیے منشیات فروشوں کے خلاف بھرپور کارروائیاں جاری رہیں گی۔ انہوں نے مزید کہا کہ “پولیس منشیات کی لعنت کے خاتمے کے لیے پرعزم ہے اور یہ آپریشن بغیر کسی تفریق کے جاری رہیں گے۔”
پشاور، منشیات فروش دو خواتین گرفتار
پشاور کے علاقے فقیرآباد میں بھی پولیس نے ایک علیحدہ کارروائی کرتے ہوئے منشیات فروشی میں ملوث دو خواتین کو گرفتار کرلیا۔ ڈی ایس پی عمر آفریدی اور ایس ایچ او رضوان برکی کی نگرانی میں کیے گئے اس آپریشن میں ملزمہ مِسمت (ب) اور مِسمت (ف) کو گرفتار کیا گیا، جو بشیر آباد میں کرائے کے مکان میں غیر قانونی سرگرمیاں جاری رکھے ہوئے تھیں۔ پولیس نے چھاپے کے دوران 10 کلوگرام چرس برآمد کی۔
گرفتار خواتین پہلے بھی فیصل آباد اور پشاور میں منشیات فروشی کے مقدمات میں گرفتار ہوچکی ہیں۔ ان کے خلاف مقدمہ درج کرکے مزید تحقیقات کا آغاز کردیا گیا ہے۔
ایس پی فقیرآباد ڈویژن سید طلال احمد شاہ نے منشیات کے خلاف کارروائیوں کو مزید تیز کرنے کی ہدایت دیتے ہوئے کہا ہے کہ منشیات فروشوں کے خلاف سخت قانونی کارروائی عمل میں لائی جائے گی تاکہ شہر کو اس لعنت سے پاک کیا جا سکے۔
