وفاقی وزیر دفاع خواجہ آصف کا کہنا ہے کہ تحریک انصاف کے بانی چاہتے تھے کہ فوج ان کی جماعت کا ذیلی ادارہ بن جائے۔ایک بیان میں انہوں نے کہا ہے کہ تحریک انصاف اقتدار سے محروم ہو کر اپنے زخم چاٹ رہی ہے، 9 مئی اور 26 نومبر کے واقعات مذموم مقاصد کے لیے ہوئے۔خواجہ آصف کا کہنا ہے کہ قومی املاک پر حملوں اور شہداء کی یادگاروں کی بے حرمتی کے واقعات حقیقی ہیں، پی ٹی آئی کی سیاست ایک ذات کے لیے ہے، انہیں ملک سے کوئی سروکار نہیں، پی ٹی آئی کا طرز عمل بالکل بھی سیاسی نہیں۔وفاقی وزیر نے کہا کہ ملک استحکام کی راہ پر گامزن ہے، معاشی میدان میں کامیابیاں مل رہی ہیں، قومی محاذ پر کامیابی سے پی ٹی آئی کی بے چینی اور بیزاری میں اضافہ ہوا ہے۔ان کا کہنا ہے کہ تحریک انصاف نے ملکی مفادات کو نقصان پہنچانے کی سازش کی ہے، یہ سنجیدہ لوگ نہیں، ذاتی مفادات کے لیے کر رہے ہیں۔وزیر دفاع نے کہا کہ عوام باشعور ہیں، پی ٹی آئی کا مکروہ چہرہ سامنے آگیا، ملک کے خلاف تمام سازشیں ناکام ہوں گی، ہم نے سیاسی انتقام کا سامنا کیا، لیکن ملک کے وقار کے خلاف بات نہیں کی، انتشار کی سیاست ہمیشہ کے لیے دفن ہوجائے گی۔خواجہ آصف کا یہ بھی کہنا ہے کہ پاکستان کے برطانیہ کے ساتھ اہم سفارتی، عسکری اور اقتصادی تعلقات ہیں، دونوں ممالک کے درمیان مختلف شعبوں میں تعلقات مثالی ہیں، آرمی چیف جنرل عاصم منیر برطانیہ کے اہم دورے پر ہیں۔
