جنگ کی نوعیت بدل گئی! فیلڈ مارشل عاصم منیر نے جدید ٹیکنالوجی اور مقامی تیاری پر زور دیا۔
چیف آف ڈیفنس فورسز، فیلڈ مارشل عاصم منیر نے کہا ہے کہ جنگ کی نوعیت میں نمایاں تبدیلی آ چکی ہے اور مستقبل کی جنگی حکمت عملی میں جدید ٹیکنالوجی مرکزی کردار ادا کرے گی۔ انہوں نے مسلح افواج کی جانب سے جدید ٹیکنالوجی کو اپنانے، جدت، مقامی تیاری اور مطابقت پر خصوصی توجہ دینے کو سراہا۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر نے بہاولپور گریژن کا دورہ کیا، جہاں انہوں نے روہی ای اسکلز لرننگ ہب اور آرمی پبلک اسکول عباسیہ کیمپس کا افتتاح کیا۔ یہ اقدامات ملکی دفاع کی جدید صلاحیتوں کو فروغ دینے اور نوجوانوں کو جدید اسکلز سے روشناس کرانے کے لیے کیے جا رہے ہیں۔
اس دوران فیلڈ مارشل عاصم منیر نے ای ایم ای ریجنل ورکشاپ کا بھی دورہ کیا، جہاں انہیں جدید پلیٹ فارمز کی دیکھ بھال، معاون جنگی اقدامات اور جدید اسلحہ نظام سے متعلق تفصیلی بریفنگ دی گئی۔
بہاولپور گریژن پہنچنے پر آرمی چیف نے یادگار شہداء پر پھول رکھ کر فاتحہ خوانی کی اور شہداء کی قربانیوں کو خراج تحسین پیش کیا۔
فیلڈ مارشل عاصم منیر کے مطابق مسلح افواج مستقبل کی جنگ میں اپنی حکمت عملی میں جدید ٹیکنالوجی اور مقامی تیاری کو مرکزی حیثیت دیں گی، تاکہ دفاعی قوت میں مزید استحکام اور استعداد پیدا ہو۔
