اسلام آباد: پاکستانی سیکیورٹی ذرائع کے مطابق پاکستان آرمی نے 3 اور 4 مارچ کی درمیانی شب پاک افغان سرحد سے ملحقہ بلوچستان کے مختلف علاقوں میں بڑے پیمانے پر جوابی فوجی کارروائی کا آغاز کیا ہے۔
حکام نے بتایا کہ یہ کارروائی ان مبینہ ٹھکانوں اور پوسٹوں کے خلاف کی جا رہی ہے جو کالعدم عناصر اور ان کے سہولت کاروں کے زیر استعمال تھیں۔
ذرائع نے مزید کہا کہ اس آپریشن کا مقصد سرحد پار سے ہونے والی دہشت گردی کی سرگرمیوں کو مؤثر طریقے سے روکنا اور ملکی سلامتی کو درپیش خطرات کو ختم کرنا ہے۔
کارروائی میں 50 سے زائد مقامات کو نشانہ بنایا جا رہا ہے، اور اس دوران جدید اور بھاری ہتھیار استعمال کیے جا رہے ہیں جن میں براہِ راست اور بالواسطہ فائرنگ کرنے والے ہتھیار، اینٹی ٹینک گائیڈڈ میزائل (ATGMs)، راکٹ لانچر، طویل فاصلے تک مار کرنے والے مارٹر، ہلکی اور بھاری توپخانہ، مین بیٹل ٹینکس (MBTs) اور سوارم ڈرونز شامل ہیں۔
ڈرونز زمینی دستوں کے ساتھ مل کر مخصوص اہداف کو نشانہ بنا رہے ہیں۔
سیکیورٹی ذرائع کے مطابق یہ ایک حساب شدہ اور سخت نوعیت کی کارروائی ہے جس کا مقصد دہشت گرد عناصر اور ان کے سہولت کاروں کو فیصلہ کن نقصان پہنچانا ہے اور سرحدی علاقوں میں مؤثر دفاعی توازن قائم کرنا ہے۔
بلوچستان کے حساس سیکٹرز جیسے قلعہ سیف اللہ (پشین، لوئے بند اور بادینی سیکٹر)، ژوب (سمبازہ اور گھڈوانہ سیکٹر)، نوشکی (جانی اور غزنالی سیکٹر) اور چلتن رینجز (گلستان، دوبندی اور ششکا سیکٹر) میں کارروائیاں جاری ہیں۔
یہ بھی پڑھیں : سیکیورٹی فورسزکی بلوچستان اور خیبرپختونخوا میں کارروائیاں،34 دہشت گرد ہلاک
ذرائع کا کہنا ہے کہ یہ مقامات سرحد پار سے دہشت گردی کی سرگرمیوں کے لیے مبینہ طور پر استعمال کیے جا رہے تھے۔
حکام نے واضح کیا ہے کہ یہ کارروائی اس وقت تک جاری رہے گی جب تک خطرات کو مکمل طور پر غیر مؤثر نہ بنایا جائے اور سرحدی علاقوں میں دفاعی توازن بحال نہ ہو۔
پاکستان نے ایک بار پھر اپنی خودمختاری، سرحدوں اور شہریوں کے تحفظ کے لیے ہر ممکن اقدام اٹھانے کا عزم دہرایا ہے۔
