خیبرپختونخوا کے دارالحکومت پشاور میں شدت پسندوں کی جانب سے دو مختلف مقامات پر پولیس چوکیوں پر حملوں کی کوشش کی گئی، جسے پولیس نے بروقت کارروائی کرتے ہوئے ناکام بنا دیا۔
پولیس کے مطابق ناصر باغ کے علاقے سخی پل چوکی پر حملہ آوروں نے بھاری ہتھیاروں سے اچانک حملہ کیا، جس کے بعد علاقے میں فائرنگ اور دھماکوں کی آوازیں سنی گئیں۔ پولیس کی فوری جوابی کارروائی پر شدت پسندوں نے راکٹ فائر کیے اور اندھیرے کا فائدہ اٹھاتے ہوئے فرار ہوگئے۔
اسی دوران تھانہ متنی کی حدود میں پاسنی پولیس چوکی پر بھی حملے کی کوشش کی گئی، تاہم اہلکاروں نے مشکوک نقل و حرکت کو بروقت مانیٹر کرتے ہوئے حملہ آوروں کو پیش قدمی سے روک دیا۔
سی سی پی او میاں سعید نے واقعے کے بعد شہر بھر میں ہائی الرٹ جاری کرتے ہوئے کہا کہ پولیس ہر قسم کے حملے کا بھرپور جواب دینے کی صلاحیت رکھتی ہے اور شہریوں کے جان و مال کا تحفظ اولین ترجیح ہے۔
حکام کے مطابق متاثرہ علاقوں میں سرچ آپریشن شروع کر دیا گیا ہے جبکہ شہر کے داخلی و خارجی راستوں پر نگرانی سخت کر دی گئی ہے۔ پولیس کا کہنا ہے کہ امن و امان خراب کرنے کی کسی بھی کوشش کو ناکام بنایا جائے گا۔
