وفاقی حکومت نے صوبہ سندھ کے گورنر کے عہدے پر بڑی تبدیلی کا فیصلہ کرتے ہوئے مسلم لیگ (ن) کے سینئر رہنما نہال ہاشمی کو نیا گورنر سندھ تعینات کرنے کا فیصلہ کر لیا ہے۔ وزیر اعظم شہباز شریف نے اس حوالے سے سمری منظوری کے لیے صدر مملکت آصف علی زرداری کو ارسال کر دی ہے۔
میڈیا رپورٹس کے مطابق صدر مملکت کی منظوری کے بعد نہال ہاشمی باضابطہ طور پر گورنر سندھ کے عہدے کا حلف اٹھائیں گے۔ اس تقرری کے بعد موجودہ گورنرکامران ٹیسوری کی جگہ نہال ہاشمی صوبے کے نئے گورنر کی ذمہ داریاں سنبھالیں گے۔
ذرائع کے مطابق وزیر اعظم شہباز شریف سے نہال ہاشمی نے وزیر اعظم ہاؤس میں ملاقات بھی کی، جس میں ملک کی سیاسی صورتحال اور صوبہ سندھ کے مختلف امور پر تبادلہ خیال کیا گیا۔ اس موقع پر وزیر اعظم نے انہیں گورنر سندھ نامزد ہونے پر مبارکباد دی اور امید ظاہر کی کہ وہ اپنے تجربے کو بروئے کار لاتے ہوئے صوبے میں وفاق کی نمائندگی مؤثر انداز میں کریں گے۔
ملاقات کے دوران سندھ میں جاری ترقیاتی منصوبوں، سیاسی رابطوں اور وفاق اور صوبائی حکومت کے درمیان تعاون کو مزید مضبوط بنانے کے امور پر بھی گفتگو کی گئی۔ وزیر اعظم نے اس بات پر زور دیا کہ سندھ میں وفاقی حکومت کی پالیسیوں کو مؤثر انداز میں آگے بڑھانے کے لیے گورنر کا کردار انتہائی اہم ہوگا۔
واضح رہے کہ نہال ہاشمی کا تعلق پاکستان مسلم لیگ ن سے ہے اور وہ پارٹی کے سینئر اور تجربہ کار رہنماؤں میں شمار ہوتے ہیں۔ وہ ماضی میں سینیٹر بھی رہ چکے ہیں اور کراچی کی سیاست میں بھی خاصا اثر و رسوخ رکھتے ہیں۔
سیاسی حلقوں کے مطابق سندھ میں سیاسی توازن برقرار رکھنے اور وفاق و صوبے کے درمیان ہم آہنگی کو مضبوط بنانے کے لیے اس تقرری کو اہم قرار دیا جا رہا ہے۔ تاہم بعض حلقے اسے وفاقی حکومت کی سیاسی حکمت عملی کا حصہ بھی قرار دے رہے ہیں۔
یاد رہے کہ کامران ٹیسوری گزشتہ کچھ عرصے سے گورنر سندھ کے عہدے پر فائز تھے اور انہوں نے مختلف سماجی اور فلاحی سرگرمیوں کے ذریعے عوام میں خاصی مقبولیت حاصل کی تھی۔ اب صدر مملکت کی منظوری کے بعد نہال ہاشمی کی بطور گورنر سندھ تقرری کا باضابطہ نوٹیفکیشن جاری ہونے کا امکان ہے، جس کے بعد وہ حلف اٹھا کر اپنے عہدے کی ذمہ داریاں سنبھال لیں گے۔
