افغان نیشنل ریزسٹنس فرنٹ کے رہنما احمد مسعود نے ایک تقریب سے خطاب میں افغان طالبان رجیم پر شدید تنقید کی اور کہا کہ طالبان نے افغانستان کے عوام کو دہشت گرد گروہوں کی حمایت میں قربان کر دیا ہے۔
احمد مسعود نے الزام لگایا کہ طالبان نے القاعدہ، تحریک طالبان پاکستان (ٹی ٹی پی)، جیش العدل، انصار اللہ اور دیگر دہشت گرد تنظیموں کو محفوظ پناہ گاہیں فراہم کر کے افغانستان کو سیکیورٹی اور جیوپولیٹیکل بحران میں دھکیل دیا ہے۔ ان کے مطابق پاکستانی فوج کی جانب سے افغان سرزمین پر حملے بھی طالبان کی لاپرواہی اور دہشت گرد گروہوں کی حمایت کا نتیجہ ہیں۔
انہوں نے مزید کہا کہ آج کا بحران اور ماضی کے تمام بحرانوں کی جڑ طالبان ہیں، جنہوں نے برسوں سے مختلف دہشت گرد گروہوں کو شیلٹر اور سپورٹ فراہم کر کے نہ صرف افغانستان بلکہ خطے کو بھی خطرات میں مبتلا کر دیا ہے۔ احمد مسعود کے مطابق، آج جو جنگ اور موجودہ صورتحال پیدا ہوئی ہے، وہ طالبان کی غیر دانشمندانہ کارروائیوں کا براہ راست نتیجہ ہے۔
