نیویارک: پاکستان کو اقوام متحدہ کے کمیشن برائے منشیات کا رکن منتخب کر لیا گیا ہے۔
پاکستان کا انتخاب یو این اقتصادی و سماجی کونسل کے انتخابات میں عمل میں آیا۔ پاکستان کو 2026 سے 2029 تک چار سالہ مدت کے لیے منتخب کیا گیا ہے۔
یو این مشن کے اعلامیے کے مطابق پاکستان اقوام متحدہ اقتصادی و سماجی کونسل کی حمایت پر مشکور ہے اور اس کا کہنا ہے کہ کمیشن برائے منشیات کا رکن منتخب ہونا پاکستان پر اعتماد اور عالمی سطح پر بھروسے کا مظہر ہے۔
اعلامیے میں مزید کہا گیا کہ پاکستان عالمی انسداد منشیات کی کوششوں میں اپنا مؤثر کردار ادا کرنے کے لیے تیار ہے۔
پاکستان نے ہمیشہ عالمی سطح پر منشیات کے خلاف جنگ میں نمایاں کردار ادا کیا ہے، اور اس کا موقف ہے کہ منشیات کی اسمگلنگ، پیداوار اور استعمال کے خلاف مضبوط اور مؤثر اقدامات کی ضرورت ہے۔
پاکستان نے اقوام متحدہ میں عالمی منشیات پالیسی سے متعلق مختلف مباحثوں میں ہمیشہ فعال اور تعمیری کردار ادا کیا ہے۔ اس نئی رکنیت کے ساتھ، پاکستان عالمی سطح پر انسداد منشیات کی کوششوں میں مزید پیش قدمی کرے گا اور اپنے تجربات اور عزم کو دوسرے ممالک کے ساتھ شیئر کرے گا۔
یہ بھی پڑھیں پاکستان نے اقوام متحدہ کی سلامتی کونسل میں مسئلہ کشمیر بھرپور انداز میں اٹھا لیا
پاکستان کا اس نئی ذمہ داری کے لیے انتخاب، اس کے عالمی سطح پر منشیات کے خلاف جدوجہد اور پالیسی میں قائدانہ کردار کے عزم کو مزید مستحکم کرے گا۔
