امریکا اور چین کے درمیان جاری تجارتی تنازع نے عالمی مالیاتی منڈیوں میں غیر یقینی صورتحال پیدا کر دی، عالمی اور مقامی سطح پر سونے کی قیمتیں تاریخ کی بلند ترین سطح پر پہنچ گئی ہیں۔
دنیا بھر میں سونے کی قیمت ایک نئی ریکارڈ سطح پر پہنچ گئی ہے، عالمی سطح پر سونے کی قیمت میں 78 ڈالر کا اضافہ ہوا ہے جس کے بعد سونا3 ہزار118 ڈالر فی اونس کی سطح پر پہنچ گیا ہے۔
پاکستان میں بھی سونے کی قیمتوں میں نمایاں اضافہ ہوا ہے آل پاکستان جیمز اینڈ جیولرز ایسوسی ایشن کے مطابق 7ہزار800 روپے اضافے کے بعد فی تولہ سونے کی قیمت 3 لاکھ 28 ہزار 800 روپے پر پہنچ گئی ہے، اسی طرح 10 گرام سونے کی قیمت میں6ہزار688 روپے کا اضافہ ہوا ہے جس کے بعد قیمت 2 لاکھ 81 ہزار 893 روپے ہو گئی ہے۔
معاشی ماہرین کے مطابق اس اضافے کی بڑی وجہ امریکا اور چین کے درمیان جاری تجارتی جنگ میں بڑھتی ہوئی کشیدگی ہے، سرمایہ کار غیر یقینی حالات کے پیشِ نظر محفوظ سرمایہ کاری کی تلاش میں سونے کی جانب رخ کر رہے ہیں، جس کی وجہ سے عالمی منڈی میں اس قیمتی دھات کی طلب میں تیزی سے اضافہ ہوا ہے۔
یہ بھی پڑھیں: ٹرمپ نے چین کے سوا تمام ملکوں پر ٹیرف 90 دن کیلئے معطل کردیا
تجارتی ماہرین کا کہنا ہے کہ اگر امریکا اور چین کے درمیان تناؤ کم نہ ہوا تو سونے کی قیمتیں مزید بڑھ سکتی ہیں، جس کا اثر ترقی پذیر ممالک کی معیشتوں پر بھی پڑنے کا خدشہ ہے۔
اگر تجارتی کشیدگیاں اسی طرح برقرار رہیں تو آنے والے دنوں میں سونے کی قیمتوں میں مزید اضافہ ممکن ہے، جو نہ صرف عالمی معیشت بلکہ مقامی مارکیٹ پر بھی گہرے اثرات مرتب کرے گا۔
