ایڈیشنل سیشن جج نے وزیر اعظم شہباز شریف کی جانب سے عمران خان کے خلاف دائر 10 ارب روپے ہرجانے کے دعوے پر سماعت کی۔
تفصیلات کے مطابق سماعت کے دوران وزیر اعظم شہباز شریف ویڈیو لنک کے ذریعے عدالت میں پیش ہوئے۔ دورانِ سماعت، عمران خان کے وکیل نے وزیر اعظم سے سوال کیا کہ کیا اس وقت آپ کے سامنے دعوے کی کاپی موجود ہے؟ جس پر شہباز شریف نے جواب دیا’’جی نہیں، اس وقت میرے پاس ہرجانے کے کیس کی کاپی موجود نہیں۔‘‘
وزیر اعظم نے عدالت سے مہلت کی استدعا کرتے ہوئے کہا کہ ان کے وکلا واٹس ایپ کے ذریعے دعوے کی کاپی بھجوا رہے ہیں۔ شہباز شریف کی درخواست پر عدالت نے کارروائی میں وقفہ دے دیا۔
یاد رہے کہ وزیر اعظم شہباز شریف نے سابق وزیر اعظم عمران خان کے خلاف 10 ارب روپے ہرجانے کا دعویٰ اس بنیاد پر دائر کر رکھا ہے کہ عمران خان نے ان پر جھوٹے اور بے بنیاد الزامات عائد کیے تھے۔مزید سماعت آئندہ تاریخ پر متوقع ہے، جب عدالت فریقین کے دلائل کی روشنی میں کیس کو آگے بڑھائے گی۔
