ذوالحج کا چاند دیکھنے کے لیے مرکزی رویت ہلال کمیٹی کا اہم اجلاس آج وفاقی دارالحکومت اسلام آباد میں منعقد ہوگا۔
اجلاس کی صدارت کمیٹی کے چیئرمین کریں گے جبکہ ملک بھر سے زونل کمیٹیوں کے ارکان بھی مقامی سطح پر چاند کی رویت کے حوالے سے شہادتیں جمع کریں گے۔
سپارکو اور محکمہ موسمیات کے مطابق آج شام چاند نظر آنے کے امکانات نہ ہونے کے برابر ہیں۔ ماہرین فلکیات کا کہنا ہے کہ 27 مئی کو غروب آفتاب کے وقت چاند کی عمر صرف 11 گھنٹے ہوگی، جو کہ رؤیت کے لیے ناکافی ہے۔
سپارکو کے مطابق یکم ذوالحج 29 مئی بروز بدھ ہونے کا قوی امکان ہے، جس کے مطابق ملک بھر میں عیدالاضحیٰ 7 جون بروز جمعہ منائے جانے کی توقع ہے۔
دوسری جانب سعودی عرب میں بھی آج ذوالحج کا چاند دیکھنے کے لیے اجلاس منعقد ہوگا۔ سعودی ماہرین فلکیات کے مطابق آج چاند نظر آنے کے قوی امکانات ہیں۔ اسی طرح متحدہ عرب امارات کے فلکیاتی مرکز نے بھی پیش گوئی کی ہے کہ آج چاند نظر آسکتا ہے، جس کے تحت وہاں عیدالاضحیٰ 6 جون بروز جمعرات کو منائے جانے کا امکان ہے۔
یاد رہے کہ عیدالاضحیٰ اسلامی کیلنڈر کے مطابق 10 ذوالحج کو منائی جاتی ہے، جو دنیا بھر کے مسلمان حج کی تکمیل کے بعد قربانی کے دن کے طور پر مناتے ہیں۔
