پاکستان تحریک انصاف (پی ٹی آئی) کے چیئرمین بیرسٹر گوہر علی خان نے زور دیا ہے کہ جمہوریت کے راستے میں مزید رکاوٹیں اور کانٹے نہ بچھائے جائیں بلکہ سیاسی عمل میں آسانیاں پیدا کی جائیں۔
تفصیلات کے مطابق پی ٹی آئی کی مرکزی قیادت کا قافلہ اسلام آباد سے لاہور پہنچا اور جاتی امرا کے قریب مرزا محمد خان آفریدی کے فارم ہاؤس پر پارلیمانی پارٹی کا اہم اجلاس منعقد ہوا، جس میں بانی پی ٹی آئی عمران خان کی رہائی اور احتجاجی تحریک کے لائحہ عمل پر غور و خوض کیا گیا۔
اجلاس کے بعد خطاب کرتے ہوئے بیرسٹر گوہر نے واضح کیا کہ یہ کوئی جلسہ نہیں بلکہ پارلیمانی پارٹی کا اجلاس تھا جس میں پارٹی کی اہم پالیسیاں ترتیب دی گئیں۔ انہوں نے کہا کہ عوام عمران خان کے نظریے کے ساتھ کھڑی ہے، جو سیاسی قید میں دو سال سے بند ہیں۔
بیرسٹر گوہر نے مطالبہ کیا کہ جمہوریت کے راستے میں رکاوٹیں ختم کی جائیں اور سیاسی عمل کو آسان بنایا جائے۔ انہوں نے سوال اٹھایا کہ اتنی بڑی جماعت کے قائد کو کب تک جیل میں رکھا جا سکتا ہے۔
چیئرمین پی ٹی آئی نے اعلان کیا کہ عمران خان کی گرفتاری کو دو سال مکمل ہونے پر 5 اگست 2025 کو احتجاجی تحریک اپنے عروج پر پہنچے گی۔ اس تحریک میں عمران خان کے دونوں بیٹے قاسم اور سلیمان بھی شرکت کریں گے، جو پاکستان آنے اور تحریک کی قیادت کرنے کا حق رکھتے ہیں۔
