خیبرپختونخوا اسمبلی میں سینیٹ انتخابات کے روز ایک دلچسپ منظر اس وقت دیکھنے میں آیا جب سخت سیاسی ماحول کے بیچ ارکان اسمبلی لذیذ کھانوں کی خوشبو سے کھنچے چلے آئے اور تمام سیاسی تلخیاں وقتی طور پر پس پشت ڈال کر ظہرانے سے لطف اندوز ہوتے نظر آئے۔
نجی ٹی وی چینل (آج نیوز)کیمطابق اسمبلی لان میں سینیٹ پولنگ کے دوران ارکان اسمبلی کے لیے پرتکلف ظہرانے کا اہتمام کیا گیا، جس میں نمکین تکے، چکن قورمہ، سیخ کباب، کابلی پلاؤ، کھیر اور دیگر روایتی پکوان شامل تھے۔ مجموعی طور پر دس اقسام کے کھانے پیش کیے گئے، جن کی خوشبو نے اسمبلی کی فضا بدل دی۔
ذرائع کے مطابق کھانے کے وقت سیاسی وابستگیاں اور اختلافات ایک طرف رکھ دیے گئے اور تمام ارکان نے خوشگوار ماحول میں کھانے کا بھرپور لطف اٹھایا۔ وہ لمحات جہاں سیاسی کشیدگی عروج پر تھی، وہیں کھانے کی میز پر یکجہتی اور خوش مزاجی کا نادر نظارہ بھی سامنے آیا۔
یہ منفرد منظر سیاسی سرگرمیوں سے بھرپور دن میں ایک خوشگوار وقفے کی حیثیت رکھتا تھا، جس نے اسمبلی کے ماحول کو لمحہ بھر کے لیے نرم و خوشبودار بنا دیا۔
