وزیراعلیٰ خیبرپختونخوا علی امین گنڈاپور نے اسلحہ و شراب برآمدگی کیس میں آج کی عدالتی پیشی کے لیے مہلت طلب کر لی۔
قومی اخبار (روزنامہ جنگ ویب سائٹ )کے مطابق اسلام آباد کی ڈسٹرکٹ اینڈ سیشن کورٹ میں کیس کی سماعت ہوئی، جہاں وکیلِ صفائی ظہورالحسن نے عدالت سے درخواست کی کہ آج عدالت کے حکم کی تعمیل ہوگی، صرف کچھ وقت درکار ہے۔
عدالت کی نرمی، پیشی تک سماعت میں وقفہ
سماعت کے دوران جج مبشر حسن چشتی نے کہا، ’’آپ وقت لے لیں، بس علی امین کو پیش کر دیں۔‘‘ وکیل نے عدالت کو آگاہ کیا کہ سیکیورٹی حکام موجود ہیں، اور جیسے ہی گرین سگنل ملے گا، وزیراعلیٰ عدالت پہنچ جائیں گے۔
اس پر عدالت نے علی امین گنڈاپور کی پیشی تک سماعت میں وقفہ کر دیا۔ ذرائع کے مطابق وزیراعلیٰ کی سیکیورٹی کلیئرنس اور پروٹوکول کے باعث وقت مانگا گیا تاکہ وہ بخیروخوبی عدالت میں پیش ہو سکیں۔
پس منظر: بیان قلمبند نہ ہو سکا تھا
واضح رہے کہ گزشتہ سماعت میں وزیراعلیٰ علی امین گنڈاپور کا ضابطہ فوجداری کی دفعہ 342 کے تحت بیان قلمبند نہیں ہو سکا تھا، جس پر عدالت نے آج کی سماعت مقرر کی تھی۔
یہ کیس اس وقت توجہ کا مرکز بنا جب علی امین گنڈاپور کے خلاف اسلحہ اور شراب برآمدگی کے الزامات کے تحت کارروائی شروع کی گئی۔ کیس کی ہر پیش رفت پر قانونی و سیاسی حلقوں کی گہری نظر ہے۔
