سابق وزیراعظم نواز شریف نے کہا ہے کہ پاکستان وقت گزرنے کے ساتھ ترقی کی راہ پر گامزن ہے اور ملکی معیشت کو مزید مضبوط بنانا وقت کی اہم ضرورت ہے۔
تفصیلات کے مطابق وزیراعظم شہباز شریف نے جاتی عمرہ میں نواز شریف سے ملاقات کی، جس میں ملک کی مجموعی سیاسی و معاشی صورتحال پر تبادلۂ خیال کیا گیا۔نواز شریف نے اس موقع پر اپنے بھائی اور وزیراعظم شہباز شریف کی کاوشوں کو سراہتے ہوئے کہا کہ “شہباز صاحب، آپ کی انتھک محنت کی دنیا بھی تعریف کرتی ہے۔” انہوں نے کہا کہ حکومت کی پالیسیوں اور مسلسل جدوجہد کے باعث ملک استحکام اور ترقی کی طرف بڑھ رہا ہے۔
ملاقات میں دونوں رہنماؤں نے ملکی معیشت کو مستحکم کرنے، عوامی فلاحی منصوبوں اور سیاسی حکمت عملی پر بھی گفتگو کی۔ نواز شریف نے زور دیا کہ ملکی معیشت کو مزید مضبوط بنانا اور عوام کو ریلیف دینا موجودہ حکومت کی اولین ترجیح ہونی چاہیے۔
