محمود خان اچکزئی کی بطور اپوزیشن لیڈر نامزدگی،جے یوآئی کا حمایت کا اعلان

پاکستان, تازہ ترین / Leave a Comment /

اسلام آباد: جمعیت علمائے اسلام (ف) نے قومی اسمبلی میں قائد حزب اختلاف کے عہدے کے لیے پختونخوا ملی عوامی پارٹی کے سربراہ محمود خان اچکزئی کی نامزدگی کی حمایت کرنے پر پاکستان تحریک انصاف (پی ٹی آئی) کے ساتھ اتفاق کر لیا ہے۔

جے یو آئی کی جانب سے ایکس پر جاری بیان کے مطابق پی ٹی آئی کا ایک وفد اسلام آباد میں مولانا فضل الرحمٰن کی رہائش گاہ پر پہنچا، جہاںسربراہ جے یو آئی نے محمود خان اچکزئی کی نامزدگی کی حمایت پر رضامندی ظاہر کی۔

پی ٹی آئی وفد میں اسد قیصر، پی ٹی آئی خیبر پختونخوا کے صدر جنید اکبر اور شہرام خان ترکئی شامل تھےجبکہ جے یو آئی کے سربراہ کے ہمراہ مولانا صلاح الدین ایوبی، ایڈووکیٹ جلال الدین اور ان کے صاحبزادے مولانا اسجد محمود موجود تھے۔

بیان میں کہا گیا کہ ملاقات کے دوران پی ٹی آئی وفد نے جے یو آئی کے سربراہ سے پارلیمان میں اپوزیشن کو متحد کرنے میں کردار ادا کرنے کی درخواست کی اور ساتھ ہی کے پی میں خالی سینیٹ کی نشست کے معاملے پر تعاون کی اپیل کی۔

مزید برآں، دونوں جماعتوں نے موجودہ سیاسی اور علاقائی صورتحال پر بھی تبادلہ خیال کیا اور خیبر پختونخوا میں امن و امان کی صورتحال پر قومی جرگہ بلانے کی تجویز پر مشاورت کی، جس کا مولانا فضل الرحمٰن نے خیرمقدم کیا۔

تحریک تحفظ آئین پاکستان کے ایکس اکاؤنٹ پر بعد ازاں جاری کردہ پوسٹ میں بتایا گیا کہ اسد قیصر نے ملاقات کی تفصیلات اچکزئی کو بتائیں اور انہیں اعتماد میں لیا۔ اس دوران فیصلہ کیا گیا کہ تحریک تحفظ آئین پاکستان نومبر میں ملک بھر میں عوامی اجتماعات کا انعقاد کرے گی۔

واضح رہے کہ قومی اسمبلی میں قائد حزب اختلاف کی نشست 5 اگست کو پی ٹی آئی کے مرکزی رہنما عمر ایوب خان کی نااہلی کے بعد سے خالی ہے۔

Must Read

Scroll to Top