خیبرپختونخوا کے محکمہ ایکسائز نے فینسی اور خصوصی نمبر پلیٹس متعارف کروانے کا اہم فیصلہ کر لیا ہے، جس کے تحت شہری اب اپنی پسند کے خصوصی نمبر پلیٹس نیلامی کے ذریعے حاصل کر سکیں گے۔
دستاویزات کے مطابق محکمہ نے رولز میں ترمیم کرتے ہوئے خصوصی نمبر پلیٹس کی نیلامی کا نظام نافذ کرنے کا فیصلہ کیا ہے تاکہ شہری اپنی پسند کے نمبر پلیٹس قانونی طور پر حاصل کر سکیں۔ اس اقدام کا مقصد نہ صرف شہریوں کو سہولت فراہم کرنا ہے بلکہ اس سے محکمہ کو بھی ریونیو کے نئے ذرائع میسر آئیں گے۔
رولز کے تحت فینسی نمبر پلیٹس کی فیس ڈیڑھ لاکھ روپے تک رکھی جائے گی، جبکہ مخصوص نمبر پلیٹس کی بنیادی قیمت 10 لاکھ روپے مقرر کی گئی ہے۔ مزید تفصیلات کے مطابق تین یکساں حروف اور تین یکساں اعداد پر مشتمل نمبر پلیٹ کی فیس ایک لاکھ روپے رکھی جائے گی۔
محکمہ ایکسائز نے شہریوں کو ہدایت کی ہے کہ رولز میں ترامیم پر 15 دن کے اندر اپنے اعتراضات یا تجاویز پیش کریں، تاکہ حتمی فیصلے سے قبل عوامی رائے بھی شامل کی جا سکے۔
ماہرین کا کہنا ہے کہ فینسی اور خصوصی نمبر پلیٹس کی متعارف کرانے سے شہریوں میں دلچسپی بڑھے گی اور یہ اقدام ٹریفک نظام میں شفافیت اور محکمہ کے ریونیو میں اضافہ کرنے میں مددگار ثابت ہوگا۔
محکمہ ایکسائز نے اس منصوبے کے تحت شہریوں کے لیے آن لائن نیلامی سسٹم کی سہولت بھی فراہم کرنے کی تیاری شروع کر دی ہے، تاکہ لوگ بغیر کسی دشواری کے اپنی پسند کی نمبر پلیٹس حاصل کر سکیں۔
