عظمیٰ بخاری کے الزامات مسترد، شفیع جان کا ’مائنس عمران‘ محض خواب قرار، عوام عمران خان کی اصل طاقت ہیں
تفصیلات کے مطابق معاون خصوصی اطلاعات خیبر پختونخوا شفیع جان نے عظمیٰ بخاری کے بیانات کو بے بنیاد اور سیاسی پروپیگنڈا قرار دیتے ہوئے شدید ردعمل دیا ہے۔ شفیع جان نے کہا کہ عمران خان ہمیشہ عوام کے وزیر اعظم رہے اور عوام ہی ان کی اصل طاقت ہیں۔
شفیع جان نے واضح کیا کہ عمران خان کو کسی غیر ملکی پاسپورٹ یا حمایت کی ضرورت نہیں، کیونکہ وہ ایک غیرت مند اور محب وطن پاکستانی ہیں اور ان کا جینا مرنا اپنے ملک و قوم کے لیے ہے۔ انہوں نے کہا کہ عظمیٰ بخاری کے الزامات جھوٹ، سیاسی زہر اور پروپیگنڈا کے سوا کچھ نہیں۔
انہوں نے وفاق اور پنجاب کے وزراء کی بار بار پریس کانفرنسوں کی طرف اشارہ کرتے ہوئے کہا کہ یہ سب عمران خان کے خلاف خوف اور مایوسی کا مظہر ہے۔ شفیع جان نے عظمیٰ بخاری کو چیلنج کرتے ہوئے سوال اٹھایا کہ جندال بغیر ویزے مری کس کے کہنے پر آیا تھا۔
شفیع جان نے مزید کہا کہ ’’مائنس عمران خان‘‘ صرف ایک خواب ہے جو کبھی حقیقت نہیں بنے گا، اور ن لیگ نے خود اپنے بانی نواز شریف کو خاموشی سے مائنس کر دیا۔ انہوں نے زور دیا کہ محب وطن کون ہے اور ملک دشمن کون، اس کا فیصلہ قوم کرے گی، نہ کہ عظمیٰ بخاری۔
معاون خصوصی نے انتباہ کیا کہ مودی اور جندال سے تعلقات بڑھانے والے آج پی ٹی آئی پر بے سروپا الزامات لگا رہے ہیں، لیکن یہ الزامات حقیقت پر مبنی نہیں۔ شفیع جان نے کہا کہ عمران خان کا بیانیہ ہمیشہ ملک و قوم کے حق میں رہا ہے اور رہے گا، اور عوام ان کی سب سے بڑی طاقت ہیں۔
